Osydan naq jıyrma jyl buryn, Ahmet Baıtursynulynyń 125 jyldyǵynda jasaǵan baıandamasynda: «Keıde, shirkin, sol sabaz qaıta tirilip kelse ǵoı deısiń. Bizge uıat bolǵanymen, eń úlken mártebege endi ıe bop, sony durystap ıgere almaı jatqan sorly qazaq tiliniń saýabyna bir qalar edi-aý dep oılaısyń», depti Ábish Kekilbaıuly.
Dál bulaı ah urǵyzǵanyna qaraǵanda, Ahmet biz kóp aıtatyn ǵasyrda bir týatyn ulylyq ólshemine de syımaıtyn bolǵany ǵoı. О́zimizdiki bolǵasyn ósirip, asyryp aıtty deýdiń jóni kelmeıdi, Ahmettiń eńbegi aýmaly-tókpeli, alasapyran ýaqytta qylyshtyń júzinde júrip jasalǵan uly eńbek ekenin qazaq endi ǵana uǵa bastaǵan sııaqty.
Ortalyq Azııa elderi men Batys zertteýshileriniń ózi «Bul eshqandaı temir óndirmeıtin elde mashına jasap shyǵýmen birdeı» dep, qazaq til bilimi men ádebıeti teorııasynyń negizin qalaǵan eńbekterine asqan tańdanyspen baǵa beripti. Búginde qazaq til bilimi men ádebıet teorııasynyń tamyry Ahmetten bastaý alatynyn bilmeıtin qazaq kemde-kem.
Bıyl ult ustazy Ahmet Baıtursynulynyń týǵanyna – 145 jyl. Ǵalym murasyn nasıhattaý men atyn ulyqtaýǵa baılanysty ushan-teńiz sharýanyń basy ǵalymnyń sońǵy kúnderi ótken Almatyda bastaldy. Bilim jáne ǵylym mınıstrligi, A.Baıtursynuly atyndaǵy Til bilimi ınstıtýty men Qazaqstan Respýblıkasy Ulttyq kitaphanasynyń uıymdastyrýymen «Ahmet Baıtursynuly murasy: zertteý, júıeleý, nasıhattaý» atty halyqaralyq ǵylymı-teorııalyq konferensııa ótti. Atalǵan sharada ǵalym murasynyń zerttelýi, qazaq qana emes, basqa da túrki halyqtarynyń tili men ádebıetine tıgizgen yqpaly, ǵylymı eńbekteri men ómirine qatysty basy ashylmaı jatqan máseleler, aǵartýshy týraly tyń derekter, jańa tabylǵan arhıv materıaldary jaıynda sóz boldy. UǴA akademıgi Rábıǵa Syzdyqova, UǴA akademıgi Shora Sarybaev, fılologııa ǵylymdarynyń doktory, professor Tursyn Jurtbaı, fılologııa ǵylymdarynyń doktory, professor Aıgúl Isimaqova, A.Baıtursynuly murajaı-úıiniń dırektory Raıhan Imahanbetova, birqatar shetel ǵalymdary, Bilim jáne ǵylym mınıstrligi ókilderi, Memlekettik ortalyq muraǵat qyzmetkerleri, JOO oryndarynyń ustazdary at salysqan konferensııada «Ahmet Baıtursynovtyń eńbekteri» atty kórme uıymdastyrylyp, Ortalyq memlekettik muraǵat qorynan tabylǵan qujattar kópshilik nazaryna usynyldy.
Konferensııa aıasynda aldaǵy atqarylar sharýalar jaıy da sóz boldy. Bıyl Ahmet Baıtursynuly murasynyń tańdamaly 10 tomdyǵy, segiz serııadan turatyn derekti fılm halyqqa jol tartpaq. Bıylǵy jyly ǵana emes, ahmettaný ǵylymynyń bolashaqta zerttelýge tıis qyrlary da naqtylanyp, bir izge túsirilmek.
Almas NÚSIP, «Egemen Qazaqstan»
ALMATY