Jyldyń aýqymdy áskerı sharasyna keshendi daıyndyq bastalyp ta ketti. Sonymen, QR Qorǵanys mınıstri general-polkovnık Sáken Jasuzaqov kóshpeli jumys keńesin ótkizdi. Onyń barysynda Astana qalasynda ótetin áskerı paradty sapaly uıymdastyrý jáne ony ótkizý jóninde birqatar naqty tapsyrmalar berdi, dep habarlaıdy QR Qorǵanys mınıstrliginiń baspasóz qyzmeti.
Egemendi Qazaqstannyń tarıhynda aıryqsha dataǵa, ıaǵnı, Qarýly Kúshterdiń qurylýynyń 25 jyldyǵyna tuspa-tus kelgen aldaǵy áskerı paradtyń ózindik erekshelikteri bar. Tartylǵan jeke quram men áskerı tehnıkanyń sany boıynsha bul sherý budan buryn ótkizilgen paradtardan ózgeshe bolýy tıis.Elordadaǵy Táýelsizdik alańynda shamamen 30 jaıaý ásker paradtyq eseptop quramynda 5 000-nan asa áskerı qyzmetshi saltanatty marshpen adymdap ótýi josparlanýda. Kóztartarlyq sherýge 300-ge tarta birlik áskerı tehnıka tartylatyn bolady. Qazaqstandyq avıasııanyń kók aspandaǵy qýaty men jaýyngerlik ázirligin elimizdiń Áýe qorǵanysy kúshteriniń shamamen 80 birlik avıasııalyq tehnıkasy pash etedi. Bul rette qazaqstandyqtar alǵash ret óz kózderimen 2016 jáne 2017 jyldary áskerimizdiń arsenalyn tolyqtyrǵan sý jańa áskerı tehnıkany, zamanaýı qarý-jaraq úlgilerin tamashalap, óz baǵalaryn bere alady.
Paradtyń taǵy bir ereksheligi Qazaqstan Qarýly Kúshteriniń ardagerlerin, Qorǵanys mınıstrliginiń ıeligine berilgennen keıin alǵash ret barabanshylardyń (daýylpazshylardyń) qurama rotasynda óner kórsetetin «Jas ulan» tórt áskerı mekteptiń tárbıelenýshileri, aýmaqtyq qorǵanys brıgadasynyń rotasy, áskerı-patrıottyq klýbtardyń tárbıelenýshileri men Áskerı-tehnıkalyq mekteptiń áskerı avtomobıldi tehnıkasynda alańda júrip ótetin Qorǵanys mınıstrligi áskerı-tehnıkalyq mektepteriniń shákirtterin qatystyrýǵa tartý bolyp tabylady.
Atalmysh is-sharanyń negizgi túıini áli qupııa retinde saqtalýda. Alaıda, Qarýly Kúshterde áskerı qyzmetshilerdi irikteý jáne tehnıkany daıyndaý bastalyp ta ketti.
Áskerı parad – bul merekelik jáne kóztartarlyq is-shara ǵana emes, ol tól áskerimizdiń jaýyngerlik qýatyn, Qarýly Kúshterdiń tehnıkalyq turǵyda jabdyqtalýyn, elimiz ben halqymyzdyń egemendigi men qaýipsizdigin kúzetip júrgen áskerı qyzmetshilerdiń jaýyngerlik ázirligi men jaýyngerlik qabilettiligin kórsetý. Budan buryn Qazaqstanda ótkizilip júrgen áskerı paradtardyń árqaısysy ózinshe aıryqsha jáne este qalarlyq bolyp keledi. Sońǵy jyldary ótkizilip júrgen paradtardyń ishinde 1941-1945 jj. Uly Otan soǵysyndaǵy Jeńistiń 70 jyldyǵyna arnalǵan 2015 jylǵy parad boldy. Onyń tarıhı jáne zamanaýı bóliginde Uly Jeńistiń murageri retinde UOS jyldary men qazirgi zamanǵy qazaqstandyq armııanyń áskerı tehnıkasynyń úlgileri usynyldy.