2026 jylǵy 1 naýryzdaǵy jaǵdaı boıynsha Biryńǵaı jınaqtaýshy zeınetaqy qorynyń (BJZQ) zeınetaqy aktıvteri 25,9 trln teńgeni qurady. 2025 jyly bul kórsetkish 12%-ǵa, ıaǵnı 2,7 trln teńgege ósti, dep habarlaıdy Egemen.kz.
Qor portfeliniń qurylymynda teńgelik aktıvter 59,6%-dy, al shetel valıýtasyndaǵy úles 40,4%-dy quraıdy. Investısııalardyń basym bóligi memlekettik baǵaly qaǵazdarǵa (43%), kvazımemlekettik sektor oblıgasııalaryna (9,2%) jáne ekinshi deńgeıli bankter oblıgasııalaryna (2,4%) baǵyttalǵan.
2025 jyly Senattyń usynystarynan keıin Ulttyq Bank ınvestısııalyq strategııany jańartty. Atap aıtqanda, AQSh memlekettik baǵaly qaǵazdarynyń úlesi 30%-dan 15%-ǵa deıin qysqartylyp, aksııalar úlesi 30%-ǵa deıin ulǵaıtyldy. Sonymen qatar, valıýtalyq portfelge 10% kóleminde balamaly ınvestısııalar engizildi.
Jańa qurylym boıynsha valıýtalyq portfel jahandyq aksııalardan (30%), damýshy naryq oblıgasııalarynan (25%), korporatıvtik oblıgasııalardan (20%), balamaly quraldardan (10%) jáne damyǵan elderdiń memlekettik baǵaly qaǵazdarynan (15%) turady. Sarapshylardyń baǵalaýynsha, bul tásil portfel kiristiligin arttyrýǵa múmkindik beredi.
EAEO elderiniń 100 myńnan astam azamatyna zeınetaqy jarnasy tólendi
2025 jyldyń qorytyndysynda BJZQ aktıvteriniń kiristiligi 7,43%-dy qurap, ınvestısııalyq tabys 1,77 trln teńgege jetti. Ulttyq Bank aldaǵy ýaqytta portfeldi ártaraptandyrýdy jalǵastyryp, valıýtalyq úlesti 40% deńgeıinde saqtaýdy josparlap otyr.
Aıta keteıik, buǵan deıin BJZQ zeınetaqy aktıvterin ınvestısııalyq basqarý boıynsha invest.enpf.kz biryńǵaı aqparattyq ınternet-platformasyn iske qosqanyn habarlaǵan edik. Bul arqyly azamattar zeınetaqy aktıvterin ınternet-platforma arqyly baqylaı alady.