Qazaqstanda qan donorlyǵyn damytý aıasynda donorlarǵa beriletin tólemderdi kóbeıtý máselesi qarastyrylyp jatyr. Bul týraly Premer-mınıstr Oljas Bektenov aıtty, dep habarlaıdy Egemen.kz.
Onyń aıtýynsha, qazirgi tańda elde qaýipsizdik pen zamanaýı sapa talaptaryna saı keletin qan qyzmetiniń ortalyqtandyrylǵan jáne standarttalǵan júıesi qalyptasqan. Respýblıka boıynsha 19 qan qyzmeti uıymy jumys isteıdi: onyń ishinde 2 respýblıkalyq, 15 oblystyq jáne 2 qalalyq mekeme bar.
Qan komponentteriniń qaýipsizdigi men sapasyn qamtamasyz etý úshin donor qanyn eki kezeńdi tekserý júıesi engizilgen, sondaı-aq ony óńdeýdiń zamanaýı ádisteri qoldanylady. Infeksııalyq jáne ımmýnologııalyq qaýipsizdikke baqylaý kúsheıtilgen.
Densaýlyq saqtaý mınıstrligi 2028 jylǵa deıingi qan donorlyǵyn damytý josparyn ázirlep jatyr. Bul jospar medısınalyq qyzmetter tizbesin keńeıtýdi, sonyń ishinde gemopoetıkalyq diń jasýshalaryn transplantasııalaý baǵyttaryn qamtıdy.
Sonymen qatar, 2026-2028 jyldarǵa arnalǵan bıýdjet aıasynda donorlarǵa beriletin tegin tamaqtyń aqshalaı ótemaqysyn ulǵaıtý máselesi pysyqtalyp jatyr.
Soltústik Qazaqstanda donor úsh pasıenttiń ómirin saqtap qaldy
Premer-mınıstr «Qurmetti donor» vedomstvolyq nagradasyn qaıta engizý úshin tósbelginiń jańa nobaıy ázirlenip, tıisti zańnamalyq ózgerister daıyndalǵanyn da atap ótti.
Aıta keteıik, Qazaqstanda jyl saıyn 180 myńnan astam azamat donor atanyp, jalpy sany 250 myńnan astam ret qan jáne onyń komponentterin tapsyrady.
Máıit donorlyǵyna kelisim bergender sany 3 ese artty