Amangeldi Sembın – Áýlıeata óńirinde dúnıege kelgen degdar. Ákesi Naqyp jylqy baǵyp jaılaýǵa shyqqanda bolashaq áıgili ánshi keń dalany kórkem kúıge bólep, kósilip án salady eken. Tabıǵat tańǵajaıyp talant syılaǵan ánshiniń keń tynysy budan keıin tórtkúl dúnıeni tamsantyp, tebirentti.
Biz qolǵa alyp kórgen kóne dápter óleń órnektelgen, sýret saqtalǵan jaı dápter emes bolyp shyqty. Búginde Merki jerinde turatyn belgili aqyn Shyryn Mamaserikovanyń jeke muraǵatynda saqtalyp kelgen bul dápter – Amangeldi Sembınniń óleńmen jazylǵan haty eken. Sýrettegi de ánshiniń bozbala kúnindegi beınesi.
Bireýi aqyn, bireýi ánshi bolsam degen asqaq armanmen Almatyǵa at terletip kelgen jerlesterdiń joly sol kezdegi astanada túıisip, bir-birimen jaqyn tanysyp-bilise bastaıdy. Ekeýi eki oqý ornynda oqyp júrip-aq ult rýhanııatynyń altyn besigi bolǵan arý shaharda jıi kezdesip turady. Tipti, Shyryn aqynnyń shynaıy óleńderine tánti bolǵan ánshi Amangeldi rızashylyǵyn bildirip, aǵalyq peıilin ańǵartyp hat ta jazǵan eken. Ol, árıne, jaı hat emes, óleńmen jazylǵan órnekti sátter.
– Amangeldi óleń jazatyn. Negizgi armany aqyn bolý edi. Biraq aqyndyq buıyrmasa da, keremet ánshi boldy. Ádebıetke degen qushtarlyǵy erekshe edi. Ábdilda Tájibaev, Shona Smahanuly sııaqty tanymal qalamgerlermen bolǵan kezdesýlerden qalmaıtyn, – dedi Shyryn Mamaserikova.
Bir ǵajaby, jarty ǵasyr boıy bul dápterdi aqyn jan balasyna kórsetpegen eken. Ánshiniń jumbaq ǵumyryndaı bolyp sarǵaıyp jata beripti. Shyryn Mamaserikova endi áıgili ánshiniń bul syryn da halyq bilsin, jastar oqysyn degen oımen sandyq túbinen sýyryp kórsetti.
– Amangeldi suńǵaq boıly, sulý júzdi, qyr muryndy kelbetti jigit bolatyn. Qyz bitkenniń oǵan qyzyqpaıtyny joq edi. Biraq sol kezdegi qyzdardyń boıyndaǵy náziktik, ınabattylyq ony bildirýge jibermeıtin. Al Amangeldi áýelete án shyrqaǵanda bárimiz de tamsanatynbyz. Jerlesi bolǵandyqtan, maǵan árdaıym qaryndasym dep aǵalyq qamqorlyq kórsetip júrdi. Qyzdar men jigitter bir-birimizdiń «anketamyzdy» toltyratynbyz. Sol arqyly hat jazysyp, syrlasatynbyz. Bul qalyń dápterdiń bar qadiri osynda jatyr. О́z basym Amangeldideı talantty tulǵamen tanystyqta, bilistikte bolǵanymdy úlken qurmetpen eske alamyn, – deıdi aqyn.
«Qurbyǵa» degen bul óleńniń tarıhy osyndaı. Sondaı-aq, bul dápterge ánshiniń qolymen Abaı óleńderi de jazylypty. Endi Amangeldi Sembınniń ózi jazǵan ózge de týyndylary joq pa eken degen saýal kóldeneńdeı berdi. Kim biledi, bolýy da múmkin.
Kózden ketse de kóńilden ketpeıtin ónerpazdyń rýhy onyń salǵan ánderinde sharyqtap kelse, endi jazǵan jyrlarymen de samǵaı beredi.
Hamıt ESAMAN, «Egemen Qazaqstan»
Jambyl oblysy