Qalashyq aýmaǵynda uıymdastyrylǵan basqosýda «Astana EKSPO-2017» UK» AQ Kommersııalyq departamentiniń dırektory Dáýlet Erkimbaev jarty álem kóz tikken sharaǵa daıyndyq jumystaryn áńgimeledi. Ol aldymen bastalýyna jetpisshaqty kún qalǵan kórmeniń bıletterin turǵyndardyń satyp alýyna barlyq jaǵdaı jasalyp jatqanyn jetkizdi. Al keshege deıin kórmeniń 670 myńnan astam bıleti ıesin tapty. Onyń 13 paıyzy sheteldikterdiń enshisinde.
«Naýryz aıynda Qazaqstannyń barlyq óńirinde, naqtyraq aıtsam, oblys ortalyqtarynda bılet satatyn kassalardy ashtyq. О́tken jyldyń 10 jeltoqsanynda Astana men Almaty qalalarynda kassalar óz jumysyn bastady. Osy jyldyń 8 naýryzynda tórt óńirde bılet satatyn ortalyq ashyldy. Keıin, 20 naýryzǵa deıin bes oblysta jáne 25 naýryzdan bastap bes óńirde bılet satatyn kassalar turǵyndarǵa qyzmet ete bastady», dedi D.Erkimbaev.
Kommersııalyq departament dırektorynyń sózine sensek, bılet máselesine qatysty qıyndyqtar týyndamaıdy. «Halyqaralyq sharanyń bıletteri elimizdiń 16 óńirinde de satylýda. 6 naýryz kúni «MEGA Silkway» saýda oıyn-saýyq ortalyǵynda taǵy bir kassa ashyldy. Qazirgi tańda bizdiń bıletter 15 núktede jáne «Qazposhta» kompanııasynyń myńnan astam bóliminde satylýda. Osy aptadan bastap EKSPO-2017 kórmesiniń bıletteri temir jol bıletterimen birge elimizdiń barlyq oblysyndaǵy 220 kassada satylady», dedi departament basshysy.
EKSPO-2017 halyqaralyq kórmesiniń bıletteri Reseıdiń 7 qalasynda satyla bastaǵan. Bılet quny – 850-1650 rýbl shamasynda. Dáýlet Erkimbaevtyń málimetinshe, Máskeý, Sankt-Peterbýrg, Sochı, Qazan, Novosibir, Nıjnıı Novgorod jáne Ekaterınbýrg qalalarynda EKSPO kórmesiniń bıletterin satatyn 45 oryn bar. «Munymen jumys toqtap qalmaıdy. Biz bılet satý aımaǵyn keńeıte beremiz», deıdi ol.
Departament dırektory halyqaralyq kórmeniń eń qymbat bıleti 8 myń teńge turatynyn atap ótti. Sondaı-aq, baǵasy 20 myń teńge bolatyn lımıttelgen estelik bıletter bar. Ony alǵan azamat kórmege kez kelgen kúni kire alady. Sondaı-aq, bılette taǵy basqa jeńildikter qarastyrylǵan. «Alaıda, lımıttelgen bıletter Reseı Federasııasy aýmaǵynda satylmaıdy, tek Qazaqstanda ǵana usynylady. О́ıtkeni, ol shekteýli kólemde ǵana basylǵan. Jeńildikter de tek elimizdiń ishinde satylǵan bıletterde qarastyrylady», dedi D.Erkimbaev. «Astana EKSPO-2017» UK» AQ ókili sóziniń sońynda bul baǵytta Qytaıdyń iri týrıstik kompanııalarymen jumys jasalyp jatqandyǵyna toqtaldy.
EKSPO-2017 kórmesi bıletteriniń baǵasy jumys kúnderine – 4000 teńgege, demalys kúnderine 6000 teńgege satylýda. Belgili datasy qoıylmaǵan bıletter quny alǵashqylarymen salystyrǵanda, 2000 teńgege qymbat.
Ashat RAIQUL, «Egemen Qazaqstan»