Qaraǵandy qalasynda ekinshi dúnıejúzilik soǵysynyń ardageri Aleksandr Ilıch Balabas ǵasyrlyq mereıtoıyn atap ótti. Qurmetti dataǵa oraı áskerı qyzmetshiler ardagerdi arnaıy quttyqtap, Qorǵanys mınıstriniń hatyn tabystady, dep jazady Egemen.kz.
Qazybek bı aýdanynyń qorǵanys isteri jónindegi bóliminiń bastyǵy, polkovnık Qaırat Táttekenov mereıtoı ıesine Qorǵanys mınıstriniń quttyqtaý hatyn tabys etip, onyń erligi men Otan aldyndaǵy eńbegine joǵary baǵa berdi.
«Sizdiń ómir jolyńyz – tabandylyqtyń, eńbekqorlyq pen elge adal qyzmet etýdiń jarqyn úlgisi. Osyndaı taǵylymdy ǵumyrdy keıingi urpaqqa jetkizý – mańyzdy mindet», dedi ol.
Aleksandr Ilıch Balabas 1926 jyly dúnıege kelgen. Eńbek jolyn 1942 jyly shahtada syzbashy bolyp bastap, 1943 jyly Qyzyl Armııa qataryna shaqyrylǵan. 1944 jyly ol dańqty qolbasshy Konstantın Rokossovskıı basqarǵan 2-Belarýs maıdany quramyndaǵy 415-atqyshtar polkinde qyzmet etip, birqatar aýyr urys qımyldaryna qatysqan.
Maıdandaǵy erligi úshin ardager Qyzyl Juldyz, I dárejeli Otan soǵysy ordenderimen jáne birneshe medalmen marapattalǵan.
Áskerıler maıdangerdi ǵasyrlyq mereıtoıymen quttyqtady
Soǵystan keıin eldi qalpyna keltirý jumystaryna belsene aralasyp, Qaraǵandy óńirindegi túrli mekemelerde uzaq jyl eńbek etti. Ár jyldary №1 qurylys basqarmasynda, «Saranskpromstroı» uıymynda júrgizýshi, oblystyq klınıkalyq aýrýhanada býhgalter, «Qaraǵandyýglesbyt» mekemesinde ekonomıst bolyp qyzmet atqaryp, keıin josparlaý bólimin basqarǵan.
Búginde ǵasyr jasaǵan qarııa – úlken ári tatý otbasynyń tiregi. 3 bala tárbıelep ósirgen ardagerden 4 nemere, 5 shóbere taraǵan. Urpaqtary maıdanger atalaryn árdaıym maqtan tutyp, onyń ómir jolyn ónege etedi.
Qostanaıda 100 jastaǵy qart maıdanger daýys berdi