Aqtaý garnızonynda Qorǵanys mınıstriniń birinshi orynbasary – Bas shtab bastyǵy general-leıtenant Qanysh Ábýbákirov Áskerı-teńiz kúshteriniń jaýyngerlik, tehnıkalyq jáne jedel ázirligin jan-jaqty tekserdi. Is-shara barysynda kezekshilikti uıymdastyrý, jaýyngerlik daıyndyq jáne bólimshelerdiń tynys-tirshiligine erekshe nazar aýdaryldy, dep habarlaıdy Egemen.kz.
General-leıtenant Qanysh Ábýbákirov teńizshilerdiń qyzmetimen jáne turmys jaǵdaıymen tanysyp, olardyń materıaldyq-tehnıkalyq quraldarmen qamtamasyz etilý deńgeıin baǵalady. Desanttyq-shabýyldaý brıgadasyna barǵan kezde ol jeke quramǵa úlgili qyzmeti men áskerı boryshqa adaldyǵy úshin alǵys aıtty.
«Senderdeı rýhy myqty uldardy tárbıelegen ata-analaryńa shyn júrekten alǵys aıtamyn. Qyzmet barysynda úlken tájirıbe jınadyńdar. Aldaǵy ýaqytta da eldiń senimdi tiregi, naǵyz patrıot bolatyndaryńa senimdimin», dedi ol.
«Oral» zymyran-artıllerııalyq kemesinde Bas shtab bastyǵy qarý-jaraq júıeleriniń, navıgasııa jáne radıotehnıkalyq jabdyqtardyń daıyndyǵyn tekserdi. Oqý-jattyǵý barysynda ekıpajdyń atys tapsyrmalaryn oryndaý kezindegi is-qımyly pysyqtalyp, jeke quramnyń úılesimdiligi baǵalandy.
Armııa úıi bazasynda Defense Tech IT Park qorǵanys tehnologııalary ortalyǵy ashyldy
Sonymen qatar general-leıtenant Qanysh Ábýbákirov «Qaısar» dıversııaǵa qarsy kateri men arnaıy bólimshelerdiń Kaspıı teńiziniń qazaqstandyq akvatorııasy men porttyq aımaqtaryn sý asty jáne sý ústi qaterlerinen qorǵaýǵa ázirligin baqylady. Ol Áskerı-teńiz kúshteri óńirlik turaqtylyqty saqtaýda sheshýshi ról atqaratynyn atap ótti, sondyqtan olardyń jańǵyrtylýy Qorǵanys mınıstrliginiń basym baǵyttarynyń biri bolyp qala bermek.
Inspeksııa qorytyndysy boıynsha Bas shtab bastyǵy jaýyngerlik daıarlyqty jetildirý jáne bólimshelerdiń úılesimdiligin nyǵaıtýǵa baǵyttalǵan naqty tapsyrmalar berdi.
Elimizdiń qorǵanys salasynda qandaı sıfrlyq sheshimder engizilgen?