Kásibı merekege arnalǵan kesh teatr óneriniń qyr-syryn ashatyn sahnalyq qoıylymmen bastaldy. Sahnada tragedııa, komedııa, drama janrlarynyń syr-sıpaty túsindirilip, Ý. Shekspırdiń «Gamlet», N. Gogoldiń «Revızor», K. Ábdirahmannyń «Ketbuqa» spektaklderinen kórinister qoıyldy. Artynsha kesh júrgizýshileri sahnaǵa aty respýblıkaǵa máshhúr mańdaıaldy teatrdyń ardagerleri Qazaqstan Respýblıkasynyń Halyq ártisi, Qazaqstan Respýblıkasynyń Eńbek sińirgen qaıratkeri, «Qurmet belgisi» ordeniniń ıegeri Dosjan Janbotaev, «Qurmet» ordeniniń ıegeri Raıhan Ibraeva bastaǵan sahna maıtalmandaryn shaqyrdy. Sahna sańlaqtaryn qala ákimi Batyrlan Ahmetov kásibı merekemen quttyqtady.
– 1972 jyly qurylyp, ataqty Muhtar Áýezovtyń «Aıman-Sholpan» dramasymen shymyldyǵyn ashqan Serke teatry – elimizde ózindik orny bar kıeli qarashańyraq, bizdiń maqtanyshymyz. Sizder osyndaı qasıeti joǵary shańyraqtyń astynda halyqqa qyzmet etip kelesizder. Jarty ǵasyrǵa jýyq ýaqyt boıy kórermenderine rýhanı nár syılaýmen qatar, zor jetistikter men tolaıym tabystarǵa qol jetkizip keledi. Onyń barlyǵyn tizip aıtý mindet emes, sebebi kózi qaraqty kórermen sizderdiń barlyq jetistikterińizben tanys, ári soǵan tilektes, - degen Batyrlan Dúısenbaıuly ólkedegi teatr óneri qarashańyraǵynyń ujymyna shyǵarmashylyq tabystar tiledi. Qala basshysy QR Eńbek sińirgen qaıratkeri Serik Bulǵaqbaevqa, Mádenıet salasynyń úzdigi Sábıra Bekaıdarovaǵa, QR Mádenıet qaıratkeri, qýyrshaq trýppasynyń rejısseri Shárip Uzaqovqa, teatr ártisi Jánibek Arystanbekovke Jezqazǵan qalasynyń qurmet gramotasyn tabystady.
Qala basshysynan soń sóz alǵan qalalyq máslıhat depýtaty, kásipker, mesenat Bekzat Altynbekov Qazaqstannyń eńbek sińirgen qaıratkeri, QR halyq ártisi, teatr tarlany Dosjan Janbotaev atyndaǵy quny 80 myń teńge bolatyn syıaqymen Erke Baıdeshevti, 60 myń teńge kólemindegi QR Eńbek sińirgen qaıratkeri, sahna tarlany Serik Bulǵaqbaev atyndaǵy syıaqymen Jasulan Túsipbekovti, «Qurmet» ordeniniń ıegeri Raıhan Ibraeva atyndaǵy syıaqymen Bátıma Álkenovany marapattady. Teatr ártisteri Jánibek Arystanbekov, Ardaq Jarqynbekov, Mádı Shádenov, Nurjan Beıisbekov Qaraǵandy oblystyq mádenıet, arhıvter jáne qujattama basqarmasy basshysy Erkebulan Aǵymbaev qolynan qurmet gramotalaryn aldy. Qojamqulovtyqtardy Qaraǵandydan arnaıy kelgen, oblystyq S. Seıfýllın atyndaǵy drama teatry men Kenshiler teatrynyń ardagerleri Jomart Ábiltaev, Keńes Jumabekov quttyqtap, óner men rýhanııatqa qoldaý kórsetip otyrǵan qala jurtshylyǵy men basshylyǵyna alǵystaryn aıtty.
Sondaı-aq, kásibı merekemen óner ujymyn «Nur Otan» partııasy Jezqazǵan qalalyq fılıaly tóraǵasynyń birinshi orynbasary Gúlmıra Qajenova, Mádenıet, sport jáne aqparat qyzmetkerleri salalyq kásipodaǵy Qaraǵandy oblystyq fılıalynyń jetekshisi Sábıra Bekaıdarova, Jezqazǵan tarıhı-arheologııalyq mýzeıiniń basshysy Raýshan Qaparova, qalalyq «Qazaq tili» qoǵamynyń tóraǵasy Meıramkúl Joldasbekqyzy, Jezqazǵan mýzykalyq kolledjiniń basshysy Jumat Amanbekov, basqa da mekeme, ujym basshylary, kásipkerler quttyqtap, syı-syıapat jasady.
Merekelik kesh Elordadan arnaıy kelgen óner juldyzdary Qaıyrgeldi Omarbek, Maqpal Omarova, Qarlyǵash Abbasova, Berik Erjanovtyń án shashýyna ulasty. Merekelik keshke jınalǵan qaýym saltanatty sharada asqan kásibıliktiń kýási bolyp, kóterińki kóńil-kúımen tarqasty.
Darhan Muqan
Qaraǵandy oblysy
Jezqazǵan