Oskar De La Hoııanyń aıtýynsha Golovkın Sonderspen aıqasynda jaraqat alyp qalsa, qyrkúıek aıyna josparlanǵan Alvarespen kezdesýine tolyqtaı úlgermeı qalýy múmkin.
«Menińshe, Gennadıı men onyń promoýteri Tom Leffler De La Hoııanyń eskertýine mán berip otyr. Sebebi, áli kúnge deıin Sonderske jekpe-jek jóninde kelisimshart usynbady. Al Sonderstiń promoýteri Frenk Ýorren boksshynyń Golovkındi uzaq kútkisi kelmeıtinin eskertti. Bul Genanyń absolıýtti chempıon atanýy úshin úlken múmkindik. Estýimshe, Sonders bul isti aıaqtaýǵa 10 kúndeı ýaqyt beripti. Bolmasa, ary qaraı jyljyp, ózge qarsylas izdeıtinin jasyrmady. Orta salmaqtaǵy sońǵy belbeýge ıe bolǵysy kelse, isti jyldamdatýy tıis. Sonders aıqasýdan bas tartqan joq. Al mundaı sát endi múldem bolmaýy múmkin», – dedi Den Embroz.
«GGG-diń aldynda eki tańdaý tur. Biri – Saýl Alvarespen syıaqysy joǵary jekpe-jek ótkizý, al ekinshisi – Bıllıdiń enshisindegi WBO belbeýine talasý. Menińshe, Gennadıı Sonderske kelisimshart usynyp, De La Hoııanyń pikirimen sanaspaıtynyn kórsetkeni jón. Al Alvares Golovkınmen judyryqtasqysy kelgen bolsa, boks keshin áldeqashan uıymdastyrǵan bolar edi», – dedi Boxingnews24.com portalynyń sholýshysy.
«Gennadıı Sondersten bas tartyp, «Kanelony» qyrkúıekke deıin bostan-bos kútip qalýy múmkin. Sebebi, Golovkın-Alvares aıqasy uıymdastyrylady degenge óz basym senbeımin. Meksıkalyq bul kezdesýden 2016 jyly ashyq túrde bas tartqan. Endi osydan keıin ne kútýge bolady? Tom Leffler men Golovkın ne úshin olarǵa senim artýy kerek? Eger GGG ókilderi aldy-artyn tolyǵymen oılaıtyn bolsa, Sonderspen boks keshin tezdetip uıymdastyrǵany jón. Al De La Hoııa Golovkındi kúte turar», – dedi Den Embroz.
«Sonderstiń promoýteri aıtqandaı, Golovkınniń endigi bar jumysy kelisimshartqa qol qoıý ǵana. Qarjy máselesi tolyqtaı sheshilipti. Endi Alvares jaıly ázirge oılamaýy tıis. Kásipqoı boks – bıznes. Al aqsha júrgen jerde eshnárse kútpeıdi», – dedi ol.
«Kanelony» jeńý Gena úshin asa qıyn emes. Meksıkalyqtyń kúshin 2013 jyly kishi Floıd Meıýezerge qarsy aıqasta kórdik. Men ony tipti, Denıel Djeıkobstan da osal desem, artyq aıtpaǵan bolar edim», – dep aıaqtady Embroz.
Aıta keteıik, 2015 jyldyń qarasha aıynda orta salmaqta Saýl Alvares pýertorıkalyq Mıgel Kottony jeńgennen keıin WBC nusqasy boıynsha álem chempıony atanǵan. Al osy belbeýge basty úmitker Gennadıı Golovkın onyń mindetti qarsylasy atandy. Qos tarap 2016 jyldyń 24 mamyryna deıin boks keshin uıymdastyrý máselesin sheshýi tıis bolatyn. Biraq meksıkalyq boksshy 19 mamyrda Gennadıı Golovkınge WBC belbeýin jekpe-jeksiz berip, salmaǵyn aýystyryp ketti. Degenmen, «Kanelo» Golovkınmen judyryqtasýdan bas tartpaıtynyn birneshe ret málimdedi.
Eki jaq áli kúnge deıin naqty sheshimge kele almaı júr. Osynyń saldarynan qazaqstandyq boksshy ótken jyly nebári eki ret qana sharshy alańǵa shyqty (23 sáýir kúni Domınık Ýeıdpen, 10 qyrkúıekte Kell Brýkpen). Málimetter boıynsha Golovkın-Alvares kezdesýi osy jyldyń qyrkúıek aıyna josparlanyp otyr.
Al brıtan boksshysy Bıllı Djo Sonderstiń enshisinde orta salmaqtaǵy jalǵyz WBO belbeý bar. Qalǵany Golovkınde. Qazaqstandyq boksshy orta salmaqtaǵy barlyq belbeýge ıe bolyp, absolıýtti chempıon atanýdy armandaıtynyn birneshe ret aıtty. Kezdesýdiń qarjy máselesi sheshilgenmen, áli kúnge deıin kelisimshartqa qol qoıylmady.
Daıyndaǵan: Aıan ÁBDÝÁLI, «Egemen Qazaqstan»