Bul joly ol shvesııalyq Marııa Lındbergpen judyryqtasty. 10 raýndtyń qorytyndysy boıynsha tóreshiler 100-90, 100-90, 100-90 degen baǵa berip, biraýyzdan jeńisti Krıstına Hammerge berdi.
40 jastaǵy shvesııalyq bylǵary qolǵap sheberi ekinshi ret qarsylasyna ese jiberip otyr. 19 jekpe-jeginiń 15-in jeńip (segiz nokaýt), ekeýinde teń túsken. Al Krıstına Hammer WBO men WBC belbeýlerine ıe.
Aıta keteıik, Hammer 1990 jyly 16 tamyzda Qaraǵandy oblysyndaǵy Novodolınka eldi mekeninde týǵan. Bala kúninde otbasymen birge Germanııaǵa qonys aýdaryp, qazirgi ýaqytta Dortmýnd qalasynda turyp jatyr.
Qazaq jerinen shyqqan nemis boksshysy týraly ne bilemiz?
Hammer bokspen 15 jasynan beri aınalysyp keledi. 20 jasynda kásipqoı bokstan Germanııanyń eń jas chempıony atanǵan. WBO jáne WBC belbeýleriniń ıegeri. Oǵan orta salmaqtaǵy tıtýldardyń basyn qosý úshin IBF jáne WBA jetispeıdi.
Krıstına Hammer kásipqoı bokstaǵy debıýtin 2009 jyldyń 12 qyrkúıeginde, ıaǵnı 19 jasynda bastaǵan. Osy kúni Germanııanyń Magdebýrg qalasynda otandasy Melısa Koktermen judyryqtasyp, ekinshi raýndta tehnıkalyq nokaýtpen jeńdi. Aıta keterligi, Melısa Kokter de kásipqoı bokstaǵy alǵashqy kezdesýin ótkizgen. Hammermen judyryqtasqannan keıin ol sharshy alańǵa múldem shyqpaǵan.
2009 jyldyń 24 qazanynda Germanııanyń Dessaý qalasyndaǵy Anhalt Arena kesheninde chehııalyq Sarka Stoklaskovamen qolǵap túıistirip, tóreshilerdiń sheshimimen jeńiske jetti. Dál sol jyldyń 11 qarashasynda Berlınde serbııalyq Marııa Peıakovıchti tórtinshi raýndta tehnıkalyq nokaýtpen utty.
Kásipqoı rıngte osy ýaqyt aralyǵynda barlyǵy 21 kezdesý ótkizip, eshqaısysynda jeńilmegen. 2010 jyldyń 23 qazanynda Krıstına Hammer amerıkalyq Tereza Perossımen WBO-diń bos belbeýi úshin kúsh synasty. On raýndqa sozylǵan aıqasta tóreshiler Hammerdi jeńimpaz dep tanydy. Al ótken jyldyń qarasha aıynda amerıkalyq Kalı Reısti on raýndtyń qorytyndysy boıynsha tóreshilerdiń sheshimimen jeńip, WBC nusqasy boıynsha jańa álem chempıony atandy.
Búginge deıin Qaraǵandy oblysynda týǵan boksshy WBO belbeýin toǵyz ret, WBC-di bir ret qorǵady.