Bul úzdik áleýmettik fotosýretter kórmesin «Baýyrjan» qaıyrymdylyq qory «Make It Clear!» áleýmettik fotosýretter baıqaýy aıasynda uıymdastyryp otyr.
Onda álemdik fotograftardyń jumystaryn kez kelgen qala turǵyny 19 sáýirge deıin tamashalaı alady. Kórmede áleýmettik taqyryptaǵy túrli máselelerdi qozǵaıtyn fotosýretter qoıyldy.
Uıymdastyrýshylardyń aıtýynsha, atalmysh kórmeniń maqsaty − áleýmettik fotosýretter arqyly adamdardyń nazaryn qoǵamdaǵy túıtkildi máselelerge aýdarý. «Fotosýretter túrli taǵdyrlar men qıyndyqtardyń syryn shertip, olardyń sheshilý joldaryn izdeýge oı salady. Sebebi, osy kúni halyq vızýaldy túrde basa nazar aýdaratyndyqtan, aınalasyndaǵy máselelerge kózqarasy ózgerýi múmkin», – deıdi qaıyrymdylyq qorynyń ókilderi.
Kórmede jalpy álemdik jáne qazaqstandyq fotograftardyń 50 fotosýreti usynylypty. Metro kópshilik shoǵyrlanatyn orta bolǵandyqtan, áleýmetti fotosýretter jurt nazarynan tys qalmaıdy dep sanaıdy.
Eske salsaq, jeńimpazdardy óz kásibiniń sheberleri – tanymal fotograftar anyqtaıtyn bolady. Olardyń qatarynda Damır О́tegen, Lıýbov Harlamova, Pavel Mıheev, Nıkıta Basov jáne taǵy basqalar bar. Baıqaý myna bes atalym boıynsha anyqtalady: «Otbasyna jáne Otanǵa degen mahabbat», «Jaqynyńa degen mahabbat», «Janýarlarǵa degen mahabbat», «Balalarǵa degen mahabbat», «Eki jarty – bir bútin». Sondaı-aq, jeli qoldanýshylarynyń daýys berý nátıjesi boıynsha «Kórermender kózaıymy» atty da arnaýly marapat taǵaıyndalmaq. Júlde qorynda Canon/Nikon fotoapparaty, Leica optıkasymen Huawei smartfony, Samsung 360 beınekamerasy, fototúsirilimge arnalǵan kvadrokopter, fotografqa arnalǵan rıýgzak, (GoPro, Sony) Ekshn-kamerasy bar.
Saparbaı PARMANQULOV,
«Egemen Qazaqstan»
ALMATY