Sharaǵa OQO qalalary men aýdandarynyń ákimderi, jumyspen qamtýdy jáne áleýmettik baǵdarlamalardy úılestirý basqarmasynyń, jumyspen qamtý ortalyqtarynyń, úkimettik emes uıymdardyń basshylary jáne taǵy da basqa taraptar qatysty, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
Vıse-mınıstr, óz sózinde, 2017 jyldyń 1 qańtarynan bastap, elimizde suranysqa ıe kásipterge jáne kásipkerlik negizderine jappaı oqytý jáne daǵdylardy úıretý, nesıelendirý arqyly jappaı kásipkerlikke jaǵdaı jasaý, jumysqa ornalastyrýǵa járdemdesý men eńbekke jumyldyrýdy qoldaý arqyly eńbek naryǵyn damytý kózdeletin «Nátıjeli jumyspen qamtýdy jáne jappaı kásipkerlikti damytý» baǵdarlamasyn júzege asyrý qolǵa alynǵanyn eske saldy.
Baǵdarlamanyń alǵashqy baǵyty aıasynda 2,5 jyl oqý merzimimen kolledjder aýqymynda tegin kásibı-tehnıkalyq bilim berý uıymdastyrylyp, bul jerde bárinen buryn, mektepti aıaqtaǵan soń oqý ornyna túspegen jastar nazarǵa alynbaq. Bıyl tehnıkalyq jáne kásibı oqýǵa 21 myńnan astam jas qazaqstandyq iligedi dep kútilýde.
«Memleket, oqýǵa ketetin shyǵyndardy tolyq jaýyp, shákirtaqy tóleıtin bolady. Jol men turý qarajaty da ótelip, tehnıkalyq jáne kásibı bilim berý nysandarynda oqıtyndarǵa bir rettik ystyq as beriledi», - dep atap ótti Birjan Nurymbetov.
Sonymen qatar, kolledjder, «Atameken» UKP oqý ortalyqtary jáne kásiporyndardyń oqý ortalyqtary aıasynda kásibı oqytýǵa arnalǵan qysqa merzimdi kýrstar ótkizilmek (1-den 6 aıǵa deıin).Alys aýyldyq jerlerde turatyn azamattarǵa sabaqtardyń qoljetimdi bolýy úshin, mobıldi oqý ortalyqtary uıymdastyrylmaq: Aqmola, Aqtóbe, Shyǵys Qazaqstan, Mańǵystaý jáne Qostanaı oblystarynda arnaıy dárishanalary bar jyljymaly keshender túrinde; shalǵaı aýyldyq jerlerdegi az syıymdylyqtaǵy mektepter aýqymynda; jumys berýshiler múmkindigin paıdalana otyryp.
«Nazar aýdararlyq jaıt, eger buryn tek jumys berýshilerdiń ótinimderi arqyly oqytyp kelsek, endi tájirıbesi mol óz isiniń sheberlerin oqý úderisine tarta otyryp, suranysqa ıe kásipterge oqytatyn bolamyz», - dedi vıse-mınıstr.
Birjan Nurymbetov, Baǵdarlama qatysýshylaryna nesıe, qalalyq jerlerde «Damý» qory arqyly, aýylda jáne shaǵyn qalalarda Aýyl sharýashylyǵy qarjylaı qoldaý qory men Agrarlyq nesıe korporasııasy arqyly beriletinin habarlady. Nesıe somasy 8 myń aılyq eseptik kórsetkishke deıin ósken (18 mln teńgege deıin) jáne merzimi 5 jylǵa deıin (mal marýashylyǵy men aýylsharýashylyq kooperatıvterine – 7 jylǵa deıin). Jyldyq mólsherlemesi – 6% shamasynda.
Osymen birge, nesıe berý kezinde Agrarlyq nesıelik korporasııasy arqyly nesıelerdi kepildendirý tetigi engizilgen: bastaýysh kásipkerlerge 85% jáne kásibi qyzmet etip turǵan bıznes ıelerine 50% mańaıynda.Baǵdarlamanyń úshinshi baǵytynda jekelegen azamattar sanatyn jumysqa ornalastyrýda naqty qoldaýdy kúsheıtý, eńbek resýrstaryn jumyldyrýdy kóterý jáne eńbek naryǵynyń ınfraqurylymyn damytý maqsat tutylýda.
«Biz, jastar tájirıbesi, áleýmettik jumys oryndary jáne qoǵamdyq jumystar tárizdi jastar men áıelder jáne múmkindigi shekteýli jandar arasynda suranysqa ıe quraldardy qoldanýdy jalǵastyratyn bolamyz. Eńbek resýrstaryn jumyldyrýdy arttyrý maqsatynda, QR Úkimeti anyqtaǵan óńirlerge erikti túrde qonys aýdaratyn azamattardy memlekettik qoldaý mejelenýde. Anyǵyraq toqtalsaq, olarǵa, jol men júk tasý shyǵyndaryn óteýge arnalǵan jáne bastapqy beıimdeý qarajaty beriledi. Bıyl 2,7 myń azamattyń qonys aýdarýyna sýbsıdııa tóleý josparlanýda», - dep aqparattandyrdy vıse-mınıstr.
Osy jyly baǵdarlamany júzege asyrýǵa arnalǵan bıýdjet qarjysy 85,3 mlrd teńgeni qurasa, onyń ishinde 12,1 mlrd teńge Ońtústik Qazaqstan oblysyna bólingen. О́ńirde baǵdarlamany júzege asyrý aıasynda jumyspen qamtýdyń belsendi sharalarymen 21,1 myńnan astam adamdy qamtý josparlanyp otyr.
«Jumyssyz jáne ózin ónimsiz jumyspen qamtyǵan azamattarǵa erekshe kóńil bólinedi. Bizdiń mınıstrlik, resmı statıstıka maǵlumattaryn arqaý ete otyryp, aýyldyq eldimekender boıynsha osy sanatqa jatatyn adamdar tizimin jasaqtady. Sáıkes tizimdi barlyq óńirge jiberdik. Aýyldyq eldimekender ákimderi qysqa ýaqyt aralyǵynda olardyń mártebesin anyqtaý jóninde jumys júrgizýi, ıaǵnı atalǵan adamdardyń jumyssyzdar nemese ónimsiz jumyspen qamtylǵandar ekenin baǵamdaýy kerek. Ár azamattyń mártebesin anyqtaý arqyly, jumyssyz jáne ózin ónimsiz jumyspen qamtyǵandardy belsendi jumyspen qamtý sharalaryna tartyp, Mindetti áleýmettik medısınalyq saqtandyrý qoryna memleket jarna aýdaratyn adamdar sanyn naqty anyqtaı alamyz», - dep túıindedi Birjan Nurymbetov.
Semınar-keńesten soń, Birjan Nurymbetov, Shymkent qalasynyń halyqqa qyzmet kórsetý men jumyspen qamtý ortalyqtarynda boldy.