Álem bizdi qara altynmen nemese syrtqy saıasattaǵy iri bastamalarymyzben ǵana emes, mádenı jetistikterimizben de tanýy kerektigin aıtqan Prezıdent bul jobanyń maqsattaryn da atap ótti.
"Birinshi, otandyq mádenıet BUU-nyń alty tili – aǵylshyn, orys, qytaı, ıspan, arab jáne fransýz tilderinde sóıleýi úshin maqsatty ustanym bolýy shart. Ekinshi, ol búgingi qazaqstandyqtar jasaǵan jáne jasap jatqan zamanaýı mádenıet bolýǵa tıis. Úshinshi, mádenı qazynalarymyzdy álem jurtshylyǵyna tanystyrýdyń múldem jańa tásilderin oılastyrý kerek. Mádenı ónimderimiz tek kitap túrinde emes, ártúrli mýltımedıalyq tásildermen de shyqqany abzal. Tórtinshi, buǵan aýqymdy memlekettik qoldaý jasalýy qajet. Syrtqy ister, Mádenıet jáne sport, Aqparat jáne kommýnıkasııalar mınıstrlikteri júıeli túrde, qoıan-qoltyq jumys isteýi kerek. Besinshi, bul jumysta shyǵarmashylyq zııaly qaýym, onyń ishinde Jazýshylar odaǵy men Ǵylym akademııasy, ýnıversıtetter men qoǵamdyq uıymdar úlken ról atqarýǵa tıis. Biz zamanaýı mádenıetimizdiń qandaı ókilderi álemdik arenaǵa jol tartýy kerektigin anyqtap alýymyz kerek. Ulttyq mádenıetimizdiń ozyq úlgilerin iriktep alǵannan keıin shetelderde olardy tanystyrý rásimderin ótkizemiz", dep jazdy Elbasy.
Onyń aıtýynsha, 2017 jyl jer júzine mádenıet salasyndaǵy qaı jetistikterimizdi kórsete alatynymyzdy aıqyndap alý turǵysynan sheshýshi jyl bolmaq. Sodan soń biregeı baǵdarlama 5-7 jylda júzege asyrylady.