– Abzal, áńgimemizdi ózińiz oınap júrgen «Astana» klýbynan bastasaq. Jańa maýsym. Komanda sońǵy úsh jylda chempıondyq ataqty eshkimge bermeı keledi. Eýropa arenasyna da shyǵyp júr. Bıyl aldaryńyzǵa qandaı maqsat qoıdyńyzdar?
– О́tken jyl biz úshin óte tabysty maýsym boldy dep aıta alamyn. El chempıony atandyq, kýbokqa da qol jetkizdik, Eýropa lıgasynyń toptyq kezeńinde synǵa tústik. Bul maýsymdy ótken jylǵydan da sátti aıaqtaımyz dep úmittenemin. Eýropa arenasyna taǵy da shyǵýdy kózdep otyrmyz. Eger maqsatymyzǵa jetip jatsaq, toptyq kezeńmen shektelip qalmaı, pleı-offqa shyǵyp, jankúıerlerimizdi qýantqymyz keledi.
– Bıyl komandadan Tańat Nóserbaev, Agım Ibraımı, Roher Kanıas, Djordje Despotovıch, Ashat Taǵybergen sıaqty bilikti oıynshylar ketti. Qaı fýtbolshynyń komandada joqtyǵy bilinedi? Jańa kelgen fýtbolshylar olardyń ornyn basa alyp jatyr ma?
– Shyny kerek, alǵashynda komandadan ketken fýtbolshylardyń orny oısyrap turdy. Máselen, Tańat bapkerimizden keıin jiger beretin kapıtan edi. Roher ortalyq tustaǵy mindetin joǵary deńgeıde atqaratyn. Árqaısysy óz pozısııasynyń myqtysy bolatyn. Olar ketkennen keıin biraz mindet bizge júkteldi. Kanıastyń pozısııasyna bekitilgen kezderim de boldy.
Al qatarymyzǵa jańadan qosylǵan jigitter jattyǵý kezinde ózderin jaqsy qyrynan kórsetip júr. Jańa ortaǵa kele salyp birden sińisip ketý qıyn ǵoı. Maýsym endi bastaldy. Aldaǵy oıyndarda olardyń úlken kómegi tıedi dep senemin.
– Bir sózińizde shabýyl shebinde oınaǵym keledi degen edińiz. Bul oıyńyzdy Stanımır Stoılovqa bildirip kórdińiz be? Múmkin, «Astanaǵa» naǵyz qajet shabýylshy ózińiz shyǵarsyz?
– Bala kúnimnen shabýylshy bolýdy armandaıtynmyn. Osyǵan deıin birneshe pozısııada oınap kórdim. Biraq ýaqyt óte kele qorǵaýshy retinde jaqsy qyrymnan kórine bastaǵan sııaqtymyn. Bapkerlerim de sony baıqaǵan bolýy kerek. Onyń ústine «Astanada» shabýyl shebine jaýapty jigitter jeterlik. Men munda qorǵanysqa qajetpin. Sondyqtan, bapkerime bul týraly aıtqan joqpyn.
– Birer aı buryn Nemanıa Maksımovıchtiń «Valensııaǵa» aýysatyny belgili boldy. Komandadaǵy asa myqty oıynshynyń Ispanııaǵa ketetini ujymǵa qalaı áser etti?
– Maksımovıchtiń dál osyndaı úlken klýbqa ketip bara jatqanyna qýanyp ta, qyzyǵyp ta turmyn. Ekinshi jaǵynan qımaımyn da. Qazaqstannan álemniń alpaýyt komandalaryna aýysý ońaı emes. Biraq Nemanıa bizge Eýropanyń TOP klýbtarynda oınaý múmkin ekenin kórsetti. Erekshe bir talpynys berdi. Ujymda árbir jigit Eýropanyń úlken chempıonattaryna aýysýdy armandaıtyny anyq. Áriptesime jańa komandasynda sáttilik, úlken jetistikter tileımin.
– Jaqynda Qazaqstan Ulttyq quramasyna jańa bapker taǵaıyndaldy. Biraq onyń qol astynda ótkizgen eki oıynda da quramamyz ese jiberdi. Quramanyń nátıjesi qashan jaqsarady dep oılaısyz?
– Álemniń úzdikteri jınalǵan dodalarǵa qatysýdy, solarmen teń dárejede oınaýdy bárimiz armandap kelemiz. Alańda bapkerimizdiń nusqaýlaryn tolyqtaı oryndaımyz. Bári jospar boıynsha júrip jatqandaı bolady. Gol da soǵamyz, tipti alǵash esep ashamyz. Qaýipti shabýyldardy toqtata bilemiz. Kóbine sáttilik jetispeı jatyr. Aldaǵy ýaqytta qateliktermen kóp jumys istep, jaqsy nátıje kórsetýge tyrysamyz.
– Armenııamen oıyndy mysalǵa alaıyqshy. Sergeı Malyıdyń 64-mınýtta alańnan qýylýy jeńiliske sebep boldy dep oılaısyz ba?
– О́zderińiz kórgendeı, bul matchtyń alǵashqy taımynda jóndi oınaı almasaq ta, kelesi bólikte jıi shabýyldarǵa shyqtyq. Gol soǵatyn múmkindikterimiz de boldy. Biraq bizge jetispegeni taǵy da sol sáttilik. Al jeńiliske tek Malyıdy kinálaý durys dep oılamaımyn. Bul nátıjege búkil komanda jaýapty. О́zge jigitter óz múmkindikterin jóndi paıdalanǵanda jaǵdaı basqa baǵytta órbıtin be edi?
– Keı legıonerler elimizdiń stadıondaryn synap, jasandy alańdar sapasynyń tómendigi týraly aıtady. Osyǵan qatysty qandaı pikir bildiresiz?
– Jasandy alańda oınaýdyń qıyndyǵyn túsinemin. Biraq qazirgi aýa raıyn eskersek, bizge sıntetıkalyq alań tıimdirek dep oılaımyn. Artyq shyǵyndy, kútip-baptaýdy talap etpeıdi. Degenmen, keıbir jasandy alańdar bar, sapasy óte tómen. Ol jerde jaraqat alyp qalý qaýpi de joǵary. Al tabıǵı gazonnyń orny múldem bólek. Menińshe, qazaq fýtbolynyń ósip-órkendeýi, álemdik arenalarǵa shyǵýy úshin alańdar neǵurlym sapaly ári tabıǵı bolýy kerek.
– Jaqynda Granatkın týrnırinde Erkebulan Seıdahmet esimdi jas oıynshymyz kózge tústi. Reseıdiń ǵana emes Ispanııanyń da mamandary qazir ony jiti baqylap otyr. Erkebulanǵa qandaı aqyl-keńes aıtasyz?
– Granatkın týrnırinde Erkebulan «úzdik shabýylshy» atanǵanyn bilemin. Mundaı talanttardy skaýttar birden nazarda ustaıtyny belgili. «Zenıt» komandasymen birge Italııada «Viareggio Cup» týrnırine qatysqanyn estidim. Bir oıynda tórt birdeı gol soǵypty. Elimizden osyndaı daryndy oıynshylardyń shyǵyp jatqanyna qýanamyn. Bul qazaq fýtbolynyń damyp jatqanynyń aıqyn belgisi.
Endi Erkebulan osy jetistigine marqaıyp qalmaı, tynbaı jattyǵýy qajet. Basqa nárseni ysyryp tastap, tek fýtboldy oılaǵany jón. Ol áli jas. Úlken alańdaǵy ómiri endi bastaldy. Tájirıbe jınaýy qajet. Eresekter fýtbolyna sińip ketý qıyndaý. Eger tynbaı daıyndalar bolsa, bolashaǵynan úlken úmit kútýge bolady. Qazaqty álemge tanytatyn fýtbolshylardyń biri bolady dep senim artamyn. Osyny tek Erkebulanǵa emes fýtbolǵa qadam basqan inilerimniń bárine aıtqym keledi.
– Abzal, ómirdegi basty armanyńyz qandaı?
– Áýeli, bıylǵy basty josparymdy aıtaıyn. Jańa maýsymdy oıdaǵydaı aıaqtap, ulttyq qurama sapynda, «Astanamen» birge Eýropa týrnırlerinde sátti oınap, kózge túskim keledi. Al negizgi armanym – álemniń alpaýyt ujymdarynyń birinde oınaý. Anglııa, Ispanııa nemese Reseı chempıonatynda oınaǵym keledi. Áli jaspyn, múmkindigim de kóp. Osy maqsatyma jetý úshin tyrysyp júrmin. Qalǵanyn ýaqyt kórsete jatar.
– Suhbatyńyzǵa kóp rahmet!
Aıan ÁBDÝÁLI, «Egemen Qazaqstan»