Oblys ákimi Janseıit Túımebaev júrgizip otyrǵan májiliste óńirdiń energetıkalyq ınfraqurylymyn damytý, energoresýrstarmen qamtamasyz etý, elektr energııasy men tabıǵı gaz tarıfteri máseleleri qaraldy. Májiliste sóz alǵan mınıstr oblystyń asa mańyzdy mıneraldy-shıkizattyq áleýeti mol ekenin atap ótip, aldaǵy josparlarǵa toqtaldy.
«Ońtústik Qazaqstan oblysy ýran óndirý kólemi boıynsha kóshbasshy bolyp tabylady. Oblysta 8 ýran óndirýshi kásiporyn jumys isteıdi. Byltyrǵy jyly respýblıka boıynsha jalpy 24,6 myń tonna ýran, onyń ishinde Ońtústik Qazaqstan oblysynda shamamen 19 myń tonna ýran óndirildi. Al elimizdiń óńdeý ónerkásibiniń negizgi komponentteriniń biri úsh munaı óńdeý zaýyty bolyp tabylady. Olardyń ishinde, Shymkent munaı óńdeý zaýyty óńir ekonomıkasyna óz úlesin qosýda»,-dedi mınıstr.
Aıta keteıik, byltyrǵy jyly respýblıkada 14,5 mln. tonna munaı óńdelse, onyń ishinde Shymkent zaýyty 4,5 mln. tonna munaı óńdegen. О́nerkásipti damytý úshin qajetti ınfraqurylymmen qamtamasyz etip, sapasyn jaqsartýdy aıtqan aımaq basshysy Janseıit Túımebaev elektr energııasy men tabıǵı gazdyń tarıfteri týraly sóz qozǵady.
«Ońtústik Qazaqstan oblysy boıynsha elektr qýatyna jalpy qajettilik ortasha eseppen saǵatyna 400 MVt quraıdy. Onyń 30 paıyzy ishki kózder esebinen alynsa, 70 paıyzdan astam bóligi elimizdiń soltústik óńirlerinen tasymaldanady. Ońtústik Qazaqstan oblysynda zańdy tulǵalarǵa arnalǵan elektr energııanyń tarıfteri elimizdiń basqa óńirlerimen salystyrǵanda eń joǵary deńgeıde. Bul óz kezeginde oblysta óndirilgen taýarlardyń ózindik qunynyń joǵary bolýyna, básekege qabilettiliginiń tómendeýine, halyqty jumyspen qamtýǵa, óńirdiń ınvestısııalyq tartymdylyǵyn tómendeýine ákelip otyr»,-dedi Janseıit Qanseıituly.
Osyǵan baılanysty, soltústik energııa kózderinen alynatyn elektrenergııanyń qunyn tómendetý, elektr qýatynyń naryǵyn 2018 jyldan bastap engizýdi qarastyrý, jańartylatyn energııa kózderin óndiretin jobalardy júzege asyrý úshin elektr energııasyna tirkelgen tarıfterge ózgerister engizýdi jedeldetý usynyldy.
Májiliste oblys ákiminiń orynbasary Jaqyp Bókenbaev aımaqtaǵy eldi mekenderdiń elektr energııasy men tabıǵı gazben qamtylýy boıynsha 2017-2020 jyldar aralyǵynda atqarylatyn jumystar týraly baıandama jasady.
Onyń aıtýynsha, oblys tutynýshylaryn sapaly jáne qajetti kólemde elektr energııasymen qamtamasyz etý úshin Shymkent qalasynda «Bozaryq», «Astana 1,2» qosalqy stansııalarynyń qurylysy júrgizilip jatyr. Osynyń nátıjesinde qaladaǵy ónerkásip oryndary men 430 myń turǵyn sapaly elektr qýatymen qamtamasyz etiletin bolady.
Budan bólek, óńirde 7 qosalqy elektr stansııanyń qurylysyn júrgizý josparlanyp otyr.
Ońtústik óńiriniń tabıǵı gazǵa degen jyldyq qajettiligi ortasha eseppen 1 mlrd. m3 quraıdy. Al gazdandyrý deńgeıi qazirgi tańda 62 paıyzǵa jetip otyr.
Jalpy 2021 jylǵa deıin tabıǵı gazben qamtylǵan eldimekender sany 683-ke jetip, 81 paıyzdy nemese 2 mln. 720 myń turǵyndy quraýy tıis.
Onyń ishinde 2020 jylǵa qaraı Túrkistan qalasy 100 paıyzǵa gazdandyrylatyn bolady.
Oblysta tabıǵı gazdyń tarıfi elimizdiń basqa óńirlerimen salystyrǵanda joǵary. Bul óńir ınvestısııalyq tartymdylyǵyn tómendetip, ekonomıkalyq ósimge keri áserin tıgizip otyr. Sondyqtan tabıǵı gaz tarıfin arzandatý maqsatynda, satyp alý men tasymaldaý qunyn tómendetý nemese respýblıka boıynsha ortaq birińǵaı tarıf engizýdi qarastyrý usynyldy.
Osy rette mınıstr Qanat Bozymbaev 2017 jylǵa Ulttyq Qor qarajatynan 734 mln. teńge kóleminde Saryaǵash aýdanyndaǵy birqatar eldi mekenderge gaz qubyrlaryn salý úshin qarajat qarastyrylǵanyn málimdedi.
Sondaı-aq ol elektr jáne gaz tarıfine baılanysty usynysqa oraı arnaıy jumysshy tobyn quryp, zertteý-zerdeleý jumystaryn bastaýǵa keńes berdi.