Energetıka mınıstrligi 5 sáýir kúni Novorossıısk portyndaǵy «Shesharıs» munaı termınalyna jasalǵan drondardyń soqqysyna qatysty resmı málimdeme jasady, dep habarlaıdy Egemen.kz.
Vedomstvonyń málimetinshe, qazirgi ýaqytta jaǵdaı turaqty baqylaýda. Qolda bar aqparatqa sáıkes, bul oqıǵa Qazaqstan munaıynyń eksport kólemine áser etken joq.
Mınıstrdiń keńesshisi – resmı ókil Ásel Serikpaeva atap ótkendeı, qazaqstandyq shıkizatty magıstraldyq munaı qubyrlary arqyly qabyldaý jáne tasymaldaý qalypty jumys rejıminde júzege asyp jatyr. Eksporttyq josparlar belgilengen kestege sáıkes oryndalýda.
Dýbaıdaǵy dron shabýylyn vıdeoǵa túsirgen sheteldikter ustaldy
Aıta keteıik, reseılik BAQ derekterine sáıkes, 5 sáýir kúni Krasnodar ólkesinde drondar shabýyly birneshe saǵat boıy jalǵasqan. Eń kóp zardap Novorossıısk qalasynda tirkelip, 8 adam jaraqat alǵan. Shabýyldyń negizgi nysandarynyń biri – strategııalyq mańyzy bar «Shesharıs» munaı termınaly boldy. Bul nysan arqyly, sonyń ishinde Qazaqstan munaıy da tranzıtpen tasymaldanady, degenmen onyń basym bóligi Kaspıı qubyr konsorsıýmy (KQK) arqyly jóneltiledi.
Týapse porty men munaı óńdeý zaýytyna dron shabýylynan keıin zaqym keldi
Buǵan deıin de, ótken jyldyń kúzinde, osy termınalǵa drondar shabýyly jasalǵan bolatyn. Ol kezde munaı bazasy men jaǵalaý ınfraqurylymy zaqymdanǵany habarlanǵan. Alaıda Qazaqstan Energetıka mınıstrligi sol kezde de munaı qabyldaý men tasymaldaý jumystarynyń esh kedergisiz, qalypty rejımde júrgizilgenin málimdegen.