Jıyndy ashyp, sóz sóılegen Astana qarjy ortalyǵynyń basqarýshysy Qaırat Kelimbetov «Astana» HQO úshin aǵylshyndyq jalpy quqyq onyń barynsha ıkemdiligi úshin tańdap alynǵanyn aıtty. «Álemdik tájirıbe eń úlken, tabysty jahandyq jáne óńirlik qarjy ortalyqtarynyń barlyǵynyń 85 paıyzy aǵylshyndyq jalpy quqyqtyń zańgerlik mazmun modelinde jumys isteıtindigin kórsetti. Aǵylshyndyq quqyq nemese qurlyqtyq zańnama úzdik dep daýlasýǵa da bolady. Degenmen, biz qarjylyq modelder, qarjylyq retteý negizinen aǵylshyndyq jalpy quqyqqa baǵdarlanǵandyǵyn kórip otyrmyz. Munyń eń qarapaıym negizdemesi aǵylshyndyq jalpy quqyqtyq úlgi bolarlyq jáne shyndyǵynda ol barynsha ıkemdi», dedi ol. Qaırat Kelimbetovtiń sózine qaraǵanda, aǵylshyndyq jalpy quqyq naryq talaptaryna tez arada beıimdele alady. Bul memleketke naryq quldyraǵanda nemese kerisinshe memlekettik retteý sátsizdikke ushyraǵanda qajet.
Otyrysta «Astana» HQO-nyń el ekonomıkasyna qarjy tartýǵa negizdelgen strategııalyq baǵyttary, kapıtal naryǵy, aktıvterdi basqarý, jeke tulǵalardyń ál-aýqatyn jaqsartý, ıslam qarjylandyrýy jáne ozyq qarjylyq tehnologııa jóninde keńinen áńgime boldy. Sondaı-aq, «Financial Times» basylymynyń damýshy naryqtar boıynsha redaktory Djeıms Kınjdiń jekeshelendirý strategııasy taqyrybyndaǵy baıandamasy tyńdaldy.
Basqosý barysynda ınvestısııa men qor naryǵyn damytý salasyndaǵy belgili sarapshylar men analıtıkter oı-pikirlerin ortaǵa salyp, usynystaryn jetkizdi. Sonymen qatar, sheteldik ınvestorlarǵa jańa qor bırjasynyń alańqaıy – «Astana International Exchang» bırjasy týraly málimetter usynyldy. Qor bırjasy aǵymdaǵy jyly kúzde iske qosylmaq. Onda «Samuryq-Qazyna» UÁQ-nyń eń tartymdy kompanııalarynyń aksııalary ornalastyrylady.
Ashat RAIQUL,
«Egemen Qazaqstan»