Sáıkesinshe, baǵany turaqty ustap turý sharalaryna baılanysty qadaǵalaý júrgizip, apparattyq jıynda qyzyl sózdiń qyrmanyn qyzdyrǵan baıandamalardy ótkir synǵa aldy.
Osy jıynda oblys ákiminiń orynbasary Shagýrashıd Mamalınov jedel jáne júıeli sıpattaǵy sharalar qabyldaý josparlanǵanyn baıandady. Aımaqaralyq kooperasııa aıasynda mamyr aıynyń ortasynda ońtústikten jańa pisken kókónisterden alǵashqy «jasyl kerýender» keledi dep kútilýde. Sh.Mamalınovtyń aıtýynsha, apta saıyn kartop, qyryqqabat, sábiz, qyzylsha 5 kólikten keledi. Jańa pisken kókónister negizinen áleýmettik pavılondar arasynda úlestiriledi.
Erlan Qoshanov oblys ortalyǵyndaǵy jáne oblystaǵy basqa qalalardaǵy sýpermarketterde áleýmettik sóreler jasaýdy tapsyrdy. Bul másele saýda bıznesiniń ıelerimen kelisilip jatyr. Mundaı jeke sóreler sáýir aıynyń sońyna deıin paıda bolýy kerek. Budan basqa, Qaraǵandydaǵy 23 áleýmettik pavılon men kommýnaldyq bazar «Saryarqa» ÁKK balansyna ótpek. Aldaǵy ýaqytta áleýmettik pavılondar sany eki esege artady.
Aýylsharýashylyq kooperasııany damytý – naryqta jergilikti jerde ósirilgen kókónister men ettiń satylýyna qolaıly jaǵdaı týǵyzbaq. Otandyq ónimderdi ótkizý úshin Qaraǵandyda kóterme-taratý ortalyǵyn qurý qarastyrylǵan. Qurylysty bıyl bastap, 2018 jyly bitirý kózdelgen. Aımaq basshysynyń aıtýynsha, ol dúkenderdi aralap, baǵalardy óz kózimen kórgen.
– Qazir kórsetip otyrǵan baǵalaryńyz – jer men kókteı. О́z-ózimizdi aldaýdyń qajeti joq. Baıandamańyz ádemi. Halyq bárin de kórip otyr. Naqty baǵany baqylap otyratyn jumys toby quryldy, – dep eskertti ákim orynbasaryna.
Derek boıynsha, oblysta jergilikti taýar óndirýshiler un, nan, kartop, qyzylsha, sıyr men qus eti, sút ónimderi jáne taýyq jumyrtqasy boıynsha qajettilikti qamtamasyz etip otyr. Degenmen, ózimizde shyǵarylatyn makaron ónimderi, sary maı men irimshik, kókónisterden – qyryqqabat, sábiz ben pııaz jetkiliksiz.
Mıras ASAN,
«Egemen Qazaqstan»
Qaraǵandy oblysy