Aty ańyzǵa aınalǵan aǵalarymen kilem ústinde jolyǵý jas órenderdi ózgeshe qýanyshqa bóledi. Sebebi, aǵalarynyń dańqty joly kilemge shyqqan kez kelgen balýanǵa úlgi-ónege. Eki saǵat boıy 200-den asa jas sportshyǵa grek-rım kúresiniń ádis-tásilderi men erekshelikteri jaıly erinbeı áńgimelegen Jaqsylyq aǵa, ózi de kilemge shyǵyp ádisterdi saýatty jasaýdyń qyr-syryna qanyqtyrdy.
«Mundaı sheberlik-sabaqtardyń jıi ótip turýy, ásirese, jasóspirim balýandar úshin óte mańyzdy. Olar kózimen kórgenin kóńilge toqyp, bıik shyńdardy baǵyndyrýǵa qanattanady. Tek qalalyq jerlerde ǵana emes, shalǵaı jatqan aýyl-aýdandarǵa da baryp osyndaı sharalar ótkizip, talaı bulaqtyń kózin ashýymyz kerek. Bolashaqta qazaqtyń kók týyn kókte jelbiretetin sportshylar osy jastardyń ishinde otyr», deıdi jasy 65-ke kelse de sporttyq babyn joǵaltpaǵan dańqty balýan. Osydan birer apta buryn grek-rım kúresinen alǵashqy sheberlik saǵatyn aıtýly balýan Dáýlet Turlyhanov pen sheteldik meıman, Olımpıada chempıony Komandır Madjıdov ótkizgen edi.
Igi shara Almaty qalasy Dene shynyqtyrý jáne sport basqarmasy, sondaı-aq, Qazaqstan kúres federasııasynyń qoldaýymen qolǵa alyndy. «Osy bastamany dástúrge aınaldyryp ár on kún saıyn Azııa, Álem, Eýropa chempıondaryn shaqyryp jas sportshylarǵa sheberlik saǵattary ótkizilip turady. Aldaǵy ýaqytta kúreske qatysýǵa yntasy bar óskinder atalmysh sport kesheninde aqysyz jattyǵý jasap tájirıbeli jattyqtyrýshylardan tálim alatyn bolady», deıdi uıymdastyrýshylar.
Arman OKTIаBR,
«Egemen Qazaqstan»
ALMATY