Vogue Italia jýrnalynyń ǵalamtordaǵy nusqasy 2026 jylǵy Olımpıada oıyndaryn eń sándi jarystardyń qataryna qosyp, sportshylardyń eń tańdaýly kıim úlgilerine arnaıy sholý jasady, dep jazady Egemen.kz.
Bul tizimge erekshe dızaınymen, aıryqsha tústerimen jáne stılimen kózge túsken sporttyq kıimder engen. Avtorlar tek kıim úlgilerin emes, sonymen qatar aksessýarlarǵa da aıryqsha nazar aýdarǵan.
Ulttyq olımpıada komıtetiniń málimetinshe, atalǵan sholýda qazaqstandyq mánerlep syrǵanaýshy Mıhaıl Shaıdorovtyń qysqa baǵdarlamada kıgen jarys kostıými de joǵary baǵalandy.
«Qazaqstan quramasynyń ókili Mıhaıl Shaıdorov kórermendi «Dıýna» fılmindegi Tımotı Shalame beınesin eske túsiretin kıim úlgisimen tańǵaldyrdy. Matanyń drapırovkasy men gradıentti elementteri kostıýmniń basqa bólikterimen úılesip, Denı Vılnıov fılmderine tán apokalıptıkalyq ári fýtýrıstik álem estetıkasyn kóz aldyńy ákeledi», delingen maqalada.
Shaıdorovtan bólek, Vogue Italia sholýyna ózge de mánerlep syrǵanaýshylardyń kostıýmderi endi. Atap aıtqanda: Ilıa Malının (AQSh, qysqa baǵdarlama), Pıotr Gýmennık (Reseı, qysqa baǵdarlama), Medıson Chok / Evan Beıts juby (AQSh, erkin bı), Stıven Gogolev (Kanada, qysqa baǵdarlama), Lara Nakı Gýtmann (Italııa, qysqa baǵdarlama) jáne Lorans Fýrne Bodrı / Gııom Sızeron jubynyń (Fransııa, rıtmıkalyq bı) jarys kostıýmderi nazarǵa ilikken.
Aıta keteıik, búgin Mıhaıl Shaıdorov erkin baǵdarlamada óner kórsetedi.
Mánerlep syrǵanaýdan Qazaqstan quramasynyń kóshbasshysy jekeleı syrǵanaýda qysqa baǵdarlama boıynsha 92.94 upaı jınap, nátıjesinde 5-shi orynǵa turaqtaǵan edi.