«Qazaqstan» konsert zalyndaǵy negizgi shara bastalmas buryn astanalyq jankúıerler Dımash Qudaıbergendi kireberisten kútip alyp, «Qazaqstan alǵa! Dımash alǵa!» uranymen qarsy aldy. Astanalyq jastar Dımashtyń qurmetine arnaıy fleshmob uıymdastyryp, júzge jýyq adam «Dımash» dep jazylǵan júrekti qurastyrdy.
Merekelik keshke Mádenıet jáne sport mınıstri Arystanbek Muhamedıuly qatysyp, Dımashty jeńisimen quttyqtady.
– Dımashtyń jeńisi – búkil qazaq eliniń jeńisi. Dımashtaı jas talantty dúnıege ákelgen Aıtbaevtar otbasyna myń da bir rahmet, – dep quttyqtaý lebizin arnaǵan mınıstr, Dımashtaı uldy tárbıelep-ósirgen ata-ájesin sahnaǵa arnaıy shaqyryp, qurmet kórsetip, shapan japty.
Ánsiz keshtiń kórki kirgen be, Dımash zalǵa jınalǵan 3 myńnan astam kórermen aldynda «Umytylmas kún» mýzykalyq kompozısııasyn, «Daıdıdaý» halyq ánin shyrqady. Ánshi halyqtyń ystyq yqylasy men tilektestigine alǵys bildirip, jyly lebizin arnady.
– Kez kelgen jetistikke jetken azamattardyń artynda aq jaýlyqty analarymyz turady. Meni bala kezden baǵyp-qaǵyp ósirgen ustazdaryma, úlken sahnanyń tórine deıin shyǵarǵan qazaq halqyna myń taǵzym! Zamanaýı Qazaqstannyń negizin qalaǵan Nursultan Ábishulyna rahmet aıtamyn!, – dedi ol.
Keshtiń qurmetti qonaqtary qatarynda ánshiniń ata-anasy, pedagogtary men ustazdary boldy. Ahmet Jubanov atyndaǵy Aqtóbe mýzykalyq kolledjinde Dımashqa sabaq bergen ustazy Marat Áıtimov Aqtóbeden Dımashty qarsy alý úshin arnaıy ushyp kelgen eken. Onyń aıtýynsha, kishkentaıynan-aq Dımash ózgeshe bolmysymen ózgelerden daralanyp turatyn.
– Dımash eshkimge uqsamaıdy, óte sezimtal. Án tabıǵatyn, maǵynasyn jaqsy túsinedi. Basqa qonǵan baq, dańq joly qıyn bolady. Sondyqtan adamı qalyptan aınymaı júrse eken dep tileımin. Únemi ózine synı kózqaraspen qarap, shyǵarmashylyq eńbegin ushtaı berse, bári de jaqsy bolýǵa tıis. Ol Qazaqstannyń ánshilik ónerin jańa satyǵa, álemdik deńgeıge kóterdi,– deıdi ulaǵatty ustaz.
Jýrnalısterge suhbat bergen ánshiniń ákesi Qanat Aıtbaev Dımashtyń saltanatty jeńisimen barsha jurtty quttyqtady.
– О́ner adamyn ósiretin, qanattandyratyn halyq yqylasy. Taqymyn qysyp, óz balasyndaı kórip, úlken tileýlestik bildirip otyrǵan elimizige halqymyzǵa alǵys aıtamyz. Dımashtyń kóńil-kúıi óte jaqsy, – degen ol, jurt arasyndaǵy Dımashtyń talanty men baǵy shetel asqan soń jandy dep aıtylyp júrgen keı pikirmen kelispeıtindigin aıtyp qaldy. – Dımashtyń Qazaqstandaǵy tyńdarmandary burynnan kóp boldy, Qytaıdaǵy baıqaýdan keıin tipti arta tústi, – deıdi Qanat Aıtbaev.
«Hunan TV» arnasymen shartqa baılanysty qazirgi kúni eshqandaı baspasóz betine suhbat bere almaıtyndyǵyn jetkizgen ánshiniń prodıýsseri Alpamys Shárimov Dımashtyń aldaǵy josparlary týraly aıtyp berdi.
– Fransııadaǵy tanymal telearnanyń shaqyrtýymen konserttik baǵdarlamada LP sııaqty tanymal tulǵalarymen birge óner kórsetedi. Baǵdarlama mamyr aıynda efırden kórsetilýi tıis, búginde túsirilim jumystary tolyq aıaqtaldy. Shart merzimi aıaqtala salysymen Dımash qazaqstandyq baspasóz quraldaryna arnap máslıhat ótkizedi,– dedi prodıýsser.
Aıa О́MIRTAI,
«Egemen Qazaqstan»
Sýretti túsirgen Erlan OMAROV