Olar Shymkentte «Bekjan» avtovokzalynyń kútý zalynda qala qonaqtarymen, turǵyndarmen jáne bazar satýshylarymen kezdesti. 2018 jyldyń 1 qańtarynan bastap elimizde engizile bastaıtyn MÁMS júıesiniń artyqshylyqtaryn aıtyp túsindirdi.
«Elbasymyzdyń halyqqa arnaǵan bıylǵy Joldaýynda aıtylǵandaı, 2018 jyldyń 1 qańtarynan bastap elimizde mindetti áleýmettik-medısınalyq saqtandyrý týraly zań qoldanysqa enedi. Biraq bul dárigerge qaralý, emdelý túgel aqyly bolady degendi bildirmeıdi. Al bıyl 1 shildeden bastap mindetti saqtandyrýdyń jarnasyn tóleý júzege asa bastaıdy. Degenmen, 17 áleýmettik topqa tegin medısınalyq kómek kórsetiletin bolady. Olar kimder? 18 jasqa tolmaǵan azamattar, shamamen 4,5 mıllıon. Sosyn stýdentter, zeınetkerler, múgedekter... Jalpy alǵanda 8,5 mıllıondaı adam burynǵysynsha tegin emdeledi. Bıýdjettik mekeme qyzmetkerlerimen qatar Qazaqstan halqynyń 2,5 mıllıondaı turǵyny ózin-ózi jumyspen qamtyp keledi. Eger eńbekke jaramdy azamattar mindetti áleýmettik-medısınalyq saqtandyrý jarnasyn tólemese, kelesi jyldan bastap ekstremaldy jaǵdaıdan ózge kezde tegin emdele almaıdy», – dedi QR Densaýlyq saqtaý isi jónindegi agenttigi tóraǵasynyń burynǵy birinshi orynbasary, «MÝA» AQ qoǵamdyq densaýlyq kafedrasynyń professory Serik Ibraev.
Baqtııar TAIJAN,
«Egemen Qazaqstan»