Basqosýda Memlekettik qyzmet salasyndaǵy Astana óńirlik haby Basqarýshy komıtetiniń tóraǵasy Álıhan Baımenov búgingi tańda óńirlik habty jahandyq alań deýge bolatynyn jetkizdi.
– Jahandaný men aqparattyq-kommýnıkasııalyq tehnologııalar memlekettik qyzmetti damytýda jańa synaqtardy alǵa qoıyp otyr. Túptep kelgende, memlekettik organdar básekelestik ortada jumys isteı bastady. Osyndaı jaǵdaıda shet memlekettermen aradaǵy áriptestik baılanys – ýaqyt talaptaryna laıyqty jaýap izdeýge mańyzdy qural bolady. Bul bizdiń uıym retinde ósip-órkendep kele jatqanymyzdyń kórinisi. Shet memleketterdiń tıisti uıymdarymen seriktestigimiz tereńdep keledi. Habty óńirlik dep atasaq ta, is júzinde ol óńirlik aýqymnan shyǵyp, jahandyq alańǵa aınaldy, – dedi ol.
Birikken Ulttar Uıymy aldaǵy ýaqytta Qazaqstannyń memlekettik qyzmet salasyndaǵy tájirıbesin basqa elderge usynýǵa nıetti. Bul týraly BUU Bas hatshysynyń Ońtústik-Ońtústik yntymaqtastyǵy jónindegi ókili Horhe Chedıek aıtty. Astana óńirlik haby Basqarýshy komıtetiniń tóraǵasymen aradaǵy yntymaqtastyq týraly hat almasý rásiminen keıingi sózinde Horhe Chedıek:
– BUU Ońtústik-Ońtústik yntymaqtastyǵy jónindegi basqarmasy Qazaqstannyń jınaǵan tájirıbesin basqa óńirlerge taratýǵa nıetti. Búgingi tańda dúnıe júzinde memlekettik qyzmet pen memlekettik basqarýdyń róli úzdiksiz ósip keledi. Sebebi, jańa jahandyq, aımaqtyq máselelerdiń sheshimi memlekettik qyzmetpen jáne memlekettik basqarýdyń sapasymen tikeleı baılanysty, – dedi.
Konferensııa barysynda sóz alǵan Syrtqy ister mınıstriniń orynbasary Erjan Ashyqbaev О́ńirlik habty Qazaqstan men BUU arasyndaǵy jemisti ári tabysty yntymaqtastyqtyń aıqyn mysaldarynyń biri dep baǵalady. Onyń aıtýynsha, hab halyqtyń suranysyna jaýap beretin tıimdi memlekettik tetiktiń mańyzdy bólshegi bolyp tabylady. Ol «100 naqty qadam» Ult josparynda aıtylǵan kásibı memlekettik qyzmetti qalyptastyrýǵa da ıgi yqpalyn tıgizedi.
Memlekettik qyzmet salasyndaǵy Astana óńirlik haby 2013 jyly el Úkimetiniń bastamasymen jáne BUU Damý baǵdarlamasyna oraı qurylǵan bolatyn.
Arnur ASQAR,
«Egemen Qazaqstan»