Reseıdegi Qazaqstan elshiliginde Jeńis kúni qarsańynda dástúrli qabyldaý ótkizilip, elshi Zaýytbek Turysbekov Máskeýde turatyn qazaqstandyq ardagerlermen, Uly Otan soǵysyna qatysýshylarmen kezdesti.
Elshi ardagerlerdi mereıli merekemen quttyqtap, halyqtyń qaharmandyq erligimen, maıdanger býynnyń teńdessiz eńbegimen qol jetken Uly Jeńistiń tarıhı taǵylymyna toqtalyp, osynaý ortaq Jeńiske qazaqstandyqtar qosqan qomaqty úles jaıynda keńinen áńgimeledi. «Aǵa urpaqtyń jaýyngerlik erligi men aınymas otanshyldyǵy búgingi tańdaǵy óskeleń urpaqtyń Otanǵa degen súıispenshiligine ulasýda. Sizder Reseıde tursańyzdar da, táýelsiz Qazaqstanda bolyp jatqan túbegeıli ózgeristerdi, elimizdiń órkenıetti órkendeý órisin kórip, bilip otyrsyzdar, Elshilik janyndaǵy qazaqstandyq ardagerler keńesiniń jumysyna belsene qatysyp júrsizder», dedi ol.
Qabyldaýǵa qatysyp, sóz sóılegen 96 jastaǵy Sosıalıstik Eńbek Eri Aleksandr Ejevskıı, Uly Otan soǵysyna qatysqan, búginde jasy 89-ǵa jetip otyrǵan Ákimjan Muhamedjanov, sondaı-aq Valentın Mesıas, Asqar Turalın, Valerıı Temirbaev, Gúljámıla Nurbekova, Qaıdar Qumarbekov jáne basqa da ardagerler Qazaqstan men Reseı arasyndaǵy san-salaly jemisti qarym-qatynastardyń búgingi tańdaǵy damý barysy týraly súısine aıtyp, ardagerlerge yqylaspen kóńil bólip otyrǵany úshin Qazaqstan Prezıdenti N.Á.Nazarbaevqa, elshilikke rızashylyqtaryn bildirdi.
Qabyldaý sońynda ardagerlerge eskertkish syılyqtar tapsyryldy.
Serikqalı BAIMENShE.
Máskeý.