Qylmystyq jaza izgilendiriledi

Sársenbi kúni «Nur Otan» HDP Ortalyq apparatynda «Ekonomıkalyq qylmystar úshin qylmystyq jaýapkershilikti odan ári izgilendirý» taqyrybynda dóńgelek ústel bolyp ótti. «Nur Otan» HDP elimizdegi qu­qyqtyq júıeni jetildirý, qyl­mystyq jazany izgilendirý jáne qylmysty azaıtýǵa baǵyttalǵan Memleket basshysy, partııa Tór­aǵasy Nursultan Nazarbaevtyń saıasatyn iske asyrý maqsatynda belsendi qyzmetter atqaryp keledi. Atalǵan otyrys ta osy maq­sattyń údesinen týyndaǵan-tyn. Otyrys barysynda Prezıdent N.Nazarbaevtyń qylmystyq zańnamany odan ári izgilendirý jónindegi tapsyrmasyna sáıkes ázirlengen Qylmystyq kodekske engiziletin ózgerister men tolyq­tyrýlar talqylandy. Talqylaýǵa Parlament depýtattary, áleýetti qurylymdar men basqa da memlekettik organdar, bıznes-qaýym­dastyqtar ókilderi, quqyqtaný­shy ǵalymdar qatysty. Dóńgelek ústelde «Nur Otan» HDP Tór­aǵasynyń birinshi orynbasary Nurlan Nyǵmatýlın sóz sóılep, atalǵan zań jobasy Elbasynyń tapsyrmasyna sáıkes ázirlenip otyrǵanyn, endigi maqsat osy zańnyń jedel qabyldanýyn qam­tamasyz etý ekenin atap ótti. «Qa­zirgi qylmystyq zańnamada kórsetilgen keıbir kózqarastar men prınsıpter HH ǵasyrdyń 50-shi jyldarynda negizi qalan­ǵan qaǵıdattarmen úndes. Búgingi naryqtyq ekonomıka jaǵdaıynda jáne qoǵamdy izgilendirý qajet­ti­ligi kezinde olardyń eskirgendigi kózge uryp turady. Sondyqtan bizge jaza kesý ınstıtýtynyń jańa algorıtmi qajet», dedi ol ózi­niń sózinde. Jańa zań jobasy memleket pen qoǵamǵa úlken aýyrtpalyq túsirmeıtin nemese aýyrlyǵy ortasha ekonomıkalyq qylmys­tar­dyń jaýapkershiligin yryqtan­dyrý­ǵa, sondaı-aq kásipkerlerdi qorǵaýǵa baǵyttalǵan. Sonymen qatar, bul joba qylmystyq zań­namany izgilendirý úrdisin damy­tady. Sonyń ishinde ekonomı­ka­lyq qylmys jasaǵan adam keltirilgen zııandy óz erkimen qal­py­na keltirse jáne múliktik shy­ǵyn­dy ótese, bas bostandyǵynan aıyrý túrindegi jazadan bosa­tylatyn bolady. Jaza túrinde ekonomıkalyq sanksııalardy qol­daný tájirıbesi artady. Dóńgelek ústel otyrysynyń qorytyndysy boıynsha Úkimet pen Parlamentke usynystar ázir­lenip jiberiletin boldy. Sony­men qatar, zańnyń jedel qabyl­da­nýyn qamtamasyz etý úshin Par­lament Májilisindegi «Nur Otan» HDP fraksııasyna da zań jobasyn Parlamenttiń qaraýyna tezirek usyný týraly tapsyrys beriletini aıtyldy. Jaqsybaı SAMRAT.