07.06: Apta aıshyqtary

Keshkisin shyǵatyn temir jol kóligi túnimen júrip tańerteńgilikte jetedi. Al avtobýstar 10-12 saǵat teńseltip baryp taban tireıdi. Qazirgideı ýaqyt tyǵyz, sharýa kúıgen shaqta asyǵys jolaýshylarǵa bul qolaısyz bolyp kelgen edi. Endi jaǵdaı ózgerip otyr. Qaraǵandydan Jezqazǵanǵa, Balqashqa, ol jaq­tan ile keri samǵaıtyn ushaqtar arqyly osy arada qatynaýǵa 1,5 saǵat ǵa­na jumsalatyn boldy. Budan bylaı qaraı et pisirimdeı ýaqytta úıde otyrýǵa, ne is­ti bir kúnde bitirip qaıtýǵa múmkindik bar. Aldaǵy ýaqytta Balqashtan As­tanaǵa, Astanadan Balqashqa ushatyn reıs te ashylǵaly tur.

Aıqyn NESIPBAI, Qaraǵandy.

Oqý sertıfıkattary tapsyryldy. Asyraýynda balalary bar «Asyl Ana» oblystyq uıymy kemtar analarǵa jan-jaqty qarasýdy maqsat tutady. 14 jyl ishinde qyrýar ister atqardy. Qoǵamnyń tóraıymy T. Sársekeeva múgedektigine qaramas­tan, balalarǵa shattyq syılaýdy jalǵastyryp keledi. Jýyrda onyń uıymdastyrýymen Petropavl qalalyq mádenıet úı­inde «Eresekter men balalar – ajyramas dostar» atty shara ótti. Ak­sııaǵa qo­ǵamdyq uıym, ákimdik ókilderi qatysyp, balalarǵa syılyqtar úlestirdi. Kishkentaı búldirshinder de syı-sııapatsyz qalmady. Ob­lystyq balalar quqyǵyn qorǵaý departamentiniń dırektory Vladımır Lıtvınenko Teń­dik Shaıqyqyzynyń jankeshti de tynymsyz eńbegin joǵary baǵalap, alǵys hat tapsyrdy. Bıyl 9 synypty bitirgen ba­la­lar­dyń kolledjderde tegin oqytylatynyn málimdep, birqa­taryna sertıfıkat berdi.

О́mir ESQALI,Soltústik Qazaqstan oblysy.

Dostyǵy jarasqan óńir. О́tken aptada oblys ortalyǵynda «Ertis – dostyq ózeni» atty halyqaralyq festıval kúnderi aıaqtaldy. Bul bıylǵy jylǵy el Táýelsizdiginiń 20 jyldyǵyna arnaldy. Estaı aqyn atyndaǵy qalalyq mádenıet saraıyna folklorlyq-etnografııalyq ansamblder men jeke oryndaýshylar jınaldy. Bul merekege uly ózen jaǵasynda ornalasqan Ombynyń «Móldir» ansambli, elimizdiń Shyǵys Qazaqstan oblysy men Kereký óńiriniń ónerpazdary shaqyryldy. Oblys ákiminiń orynbasary Álııa Ǵalymova festıvalǵa sát-sapar tiledi. О́ner ujymdary bir ózen boıynda turatyn ártúrli ult ókilderiniń dostyǵy men tatýlyǵyn qobyzben de, dombyramen de, áýelegen ándermen de shyrqady. Úsh kúnge sozylǵan festıval sońy gala-konsertke ulasty.

Farıda BYQAI, Pavlodar.

Jemqorlyqtyń qaı túrine de jol joq. Taraz qalasynda «Nur Otan» HDP Almaty, Qyzylorda, Ońtústik Qazaqstan, Jambyl oblystyq jáne Almaty qalalyq fılıaldarynyń partııalyq baqylaý komıssııalary men jemqorlyqpen kúres jónindegi qoǵamdyq keńes basshylarynyń qatysýymen semınar-keńes bolyp ótti. Onda partııalyq baqylaýdy jáne jemqorlyqqa qarsy is-áreketterdi uıymdastyrýdyń túrleri men ádisteri, basym baǵyttary sóz boldy. Sondaı-aq, semınar-keńes barysynda ótken dóńgelek ústelge Parlament Senatynyń depýtaty, jemqorlyqpen kúres jónindegi respýblıkalyq qo­ǵam­dyq keńestiń tóraǵasy O.Ábdikárimov, «Nur Otan» HDP Jambyl ob­lystyq fılıalynyń tóraǵasy Q.Bozymbaev qatysyp, jemqor­lyq­qa qarsy kúres jumystarynyń jaıy týraly baıandady.

Kósemáli SÁTTIBAIULY, Jambyl oblysy.

Kókshedegi aýdıo-taktıldi keshen. Kókshetaý qalalyq zaǵıp jáne nashar kóretin azamattarǵa arnalǵan kitaphana men Reseıdegi Novosibir oblystyq arnaýly kitaphanasy arasyndaǵy bes jyldyq yntymaqty baılanys nyǵaıyp keledi. Jýyrda «Kókshetaý-No­vo­sibir: tarıhqa janasý» atty aýdıo-taktıldi keshenniń tusaýy kesildi. «Nur Otan» HDP oblystyq fılıalynyń, ishki saıasat bas­qar­masynyń, oblys aýmaǵyndaǵy 7 arnaýly kitaphananyń qyzmetkerleri men qala jurt­shylyǵy qatysqan basqosýda áleýmettik jobanyń avtory Novosibir arnaýly kitaphanasynyń dırektory, RF NOAK as­so­sıasııasy jetekshisiniń oryn­basary Iýrıı Lesnovskıı keshen qyzmetiniń paıdaly ás­er­leri jaı­ynda áńgimelep, tájirıbelik sabaq ótkizdi. Aqmola oblystyq zaǵıptar qoǵamynyń tóraǵasy Dúısembaı Aqyshev, Bu­landy aýdandyq fılıalynyń basshysy Serik Ákimbaev, Lýı Braıl jú­ıesi boıynsha oblystyq baıqaýdyń jeńimpazy Hakım Qapızov reseılik áriptesterdiń ıgi qadam­da­ryna rızashylyǵyn bildirdi. 

Baqbergen AMALBEK. Aqmola oblysy.

Merekege basseın tartý etti. Balalardy qorǵaý kúni Ońtústikte laıyqty atalyp ótti. “Búgingi búldirshinder – Qazaqstannyń erteńi. Sondyqtan olarǵa qajet dúnıe búginderi daıyn bolýy kerek”, deıdi oblys ákiminiń tapsyrmasyna bıznes ókilderi de atsalysty. Jaqynda Leńgir qalasyndaǵy ortalyq saıabaqta jeke kásipker Anarbek Tastanbekov balalarǵa júzý basseınin paıdalanýǵa berdi. Alda – shyjyǵan shilde. Kanıkýlǵa shyqqan balalar taza ári qaýipsiz sýǵa túsip máz-meıram. Aýdan ákimi Áýelhan Turǵynbekov pen aýyl aqsaqaldary kásipkerge rızashylyǵyn bildirdi.

Baqtııar TAIJAN, Ońtústik Qazaqstan oblysy.

Atyraýǵa shańsorǵysh kólik keldi. Endi Atyraý qalasynyń kóshelerin arnaıy shańsorǵysh kólik tazalaýǵa shyqty. О́tken aptada Atyraý qalasynyń ákimi Mereke Ismuratovqa «CityCat-2020» shaǵyn shańsorǵysh kóliktiń múmkindikteri tanystyryldy. Ony Qazaqstanǵa jetkizýshi «IPC-Machines» kompanııa­synyń menedjeri Pavel Rasýbınskııdiń aıtýynsha, kóshe shańyn soratyn kóliktiń artyqshylyǵy kóp. Birinshiden, janarmaıdy 30 paıyzǵa deıin únemdeıdi. Ekinshiden, tek kóshelerdi ǵana emes, jaıaý júrginshiler jolyn, tar ótkelder men aıal­damalardy, aryqtardy tazalaǵanda shań kóterilmeıdi. Qala basshylyǵy tamyz aıynda osyndaı eki kólik aldy­rýdy josparlaýda.

Joldasbek ShО́PEǴUL, Atyraý.