Qanjyǵaly qart Bógenbaı atanǵan batyrdyń esimi búgingi kúni de dańq bıiginde. Batyrǵa qatysty kez kelgen málimet pen derekterge qyzyǵýshylyq tanytylady. Kúni keshe ǵana «Aq jol» partııasynyń keńsesinde uıymdastyrylǵan shara sonyń aıǵaǵy.
Qorǵanys mınıstrligi Qarýly Kúshterdiń 25 jyldyǵyna oraı aty ańyzǵa aınalǵan batyr babanyń aıbaltasy Qazaqstan Qarýly Kúshteriniń áskerı-tarıhı murajaıyna tapsyryldy. Májilis depýtattary, Qorǵanys mınıstrligi men BAQ ókilderi qatysqan sharada «Aq jol» partııasynyń tóraǵasy Azat Perýashev aıbaltanyń tarıhyna toqtaldy. Onyń aıtýynsha, urpaqtary úsh ǵasyrdan beri saqtap kele jatqan batyrdyń aıbaltasy keńes ókimeti kezinde-aq belgili bolǵan. «Aq jol» partııasy Qorǵanys mınıstrliginiń usynysymen batyrdyń tikeleı urpaqtarymen kelisim jasasyp, aıbaltany kórmege qoıýǵa alyp kelgen. «Aıbalta batyrdyń tikeleı urpaǵynyń zaıyby Fatıma Jumaǵazyqyzynyń qolynan kepildik hat arqyly alyndy. Kórme jumysy aıaqtalǵan soń zańdy ıelerine qaıtarylady. Aıbalta aq bolattan jasalǵan. Kúmispen zerlengen», degen partııa tóraǵasy aıbaltany Qarýly Kúshter áskerı-tarıhı mýzeıi qyzmetkeriniń qolyna tapsyrdy.
Aıgúl SEIILOVA,
«Egemen Qazaqstan»