Avstrııa astanasynda ótip jatqan Búkilálemdik ekonomıkalyq forýmda talqylanýda
8 maýsymda Venada Eýropa men Ortalyq Azııaǵa arnalǵan Búkilálemdik ekonomıkalyq forým jumysyn bastady. Májilister Hofbýrg saraıynyń zaldarynda ótýde jáne olar aımaqaralyq yntymaqtastyqtyń keleshegine arnalýda.
«Innovasııalar shekaralaryn keńeıtý» uranymen ótip jatqan forýmnyń baǵdarlamasynda ǵalamdyq básekelestik, resýrstardy tıimdi paıdalaný, jańa qaýip-qaterler aldynda bekemdilikti qamtamasyz etý sııaqty ózekti taqyryptar boıynsha arnaıy jumys sessııalar ótkizilýde.
Dál osy kúnderi Astanada ótip jatqan VII Búkilálemdik Islam ekonomıkalyq forýmymen qatar, Venadaǵy ekonomıkalyq kongress aǵymdaǵy aptanyń asa iri halyqaralyq oqıǵasy bolyp tabylady. Oǵan álemniń 67 elinen kelgen júzdegen qatysýshylar, atap aıtqanda, memleket jáne úkimet basshylary, ekonomıkalyq vedomstvolar men ulttyq qarjy ınstıtýttarynyń jetekshileri, halyqaralyq isker elıtasy, akademııalyq toptar men azamattyq qoǵam ókilderi qatynasýda.
Búkilálemdik ekonomıkalyq forým jumysyna Qazaqstan delegasııasynyń quramynda Premer-Mınıstrdiń orynbasary Erbol Orynbaev, Ekonomıkalyq damý jáne saýda mınıstri Qaırat Kelimbetov, Ekonomıkalyq ıntegrasııa mınıstri Janar Aıtjanova qatysýda. Is-sharalar baǵdarlamasyna sáıkes, Q.Kelimbetovke uıymdastyrýshy retinde forýmǵa teń tóraǵalyq etý qurmetti ári jaýapty mindeti júkteldi. Kongress teń tóraǵalary qatarynda sondaı-aq brıtanııalyq «BT Group» basshysy Maıkl Reık, Reseı «Sberbanki» basqarma tóraǵasy German Gref, GFR-diń «SAP» konserniniń atqarýshy dırektory Djım Hagemann-Shnab bar.
Forým qarsańynda jáne onyń barysynda qazaqstandyq delegasııa avstrııalyq tarappen birqatar mańyzdy ekijaqty kezdesýler ótkizdi. Erbol Orynbaev Avstrııanyń Federaldyq Prezıdenti Haıns Fıshermen suhbat qurdy. Vıse-premer sondaı-aq forýmnyń «Ortalyq Azııa burylý pýnktinde» atty sessııasynda sóz sóıledi. Qazaqstandyq delegasııa basshysynyń koalısııalyq konservatıvtik partııasynyń kóshbasshysy, Federaldyq Vıse-kansler – Eýropalyq jáne halyqaralyq ister jónindegi mınıstr Mıhael Shpındeleggermen kezdesýi josparlanýda.
Elimizdiń Ekonomıkalyq damý jáne saýda mınıstrligi Qazaqstan-Brıtanııa saýda-ekonomıkalyq palatasymen birlese otyryp forýmnyń jetekshi sarapshylarymen jumys kezdesýin uıymdastyrdy. Qazaqstandyq delegasııa sondaı-aq IýNIDO-nyń bas dırektory K.Iýmkellamen kezdesti.
Avstrııanyń ónerkásipshiler birlestigi Qazaqstan Úkimeti músheleri qurmetine qabyldaý jasap, oǵan elimizdiń Údemeli ındýstrııalyq-ınnovasııalyq damý baǵdarlamasyna qyzyǵýshylyq tanytyp otyrǵan jetekshi avstrııalyq kompanııalardy shaqyrdy.
Qazaqstan delegasııasy músheleri forýmnyń «Infraqurylym ornyqtylyǵy», «Eýropa jáne Ortalyq Azııanyń ashylmaǵan áleýeti» jáne «Energetıkalyq qaýipsizdiktiń tepe-teńdigi» sessııalarynda baıandama jasaýda. Forým qatysýshylary qatarynda «Samuryq-Qazyna» Ulttyq ál-aýqat qory» AQ jáne Qazaqstannyń isker toptarynyń ókilderi bar.
Sapar aıasynda Janar Aıtjanova Avstrııanyń ekonomıkalyq jáne saýda vedomstvolary basshylyqtarymen kezdesýler ótkizip, ekijaqty yntymaqtastyq, Qazaqstannyń Búkilálemdik saýda uıymyna enýi, sondaı-aq Qazaqstan, Belarýs jáne Reseı arasyndaǵy Kedendik odaq qyzmeti jaıynda pikir almasty.
Qazaqstandyq delegasııa Kedendik odaq jáne qalyptasyp otyrǵan Biryńǵaı ekonomıkalyq keńistiktiń zańdyq negizi týraly, osyǵan oraı 170 mıllıon halqy bar odaq aýmaǵyna ónim ótkizýge múmkindigi bar Qazaqstanda ınvestorlar úshin jańa kókjıekter ashylǵany jaıynda habardar etti.
Talǵat JUMAǴULOV, «Egemen Qazaqstan» – Venadan.