Keshe Halyqaralyq kórme bıýrosynyń (HKB) shtab-páterinde EKSPO jobasynyń Qazaqstandaǵy ulttyq úılestirýshisi, Qazaqstan Respýblıkasy SIM-iniń jaýapty hatshysy Rápil Joshybaev Qazaqstan Úkimeti atynan HKB-nyń bas hatshysy Vısente Lossertalesqa 2017 jyly Astanada EKSPO-nyń mamandandyrylǵan kórmesin ótkizýge ótinim tapsyrdy. Qazaqstan Respýblıkasynyń Fransııadaǵy elshisi Nurlan Dánenovtiń qatysýymen ótken bul rásim 2008 jyly Saragosa qalasynda (Ispanııa) EKSPO-nyń Halyqaralyq mamandandyrylǵan kórmesine qatysqan kezinde taıaý bolashaqta Astanada kórme uıymdastyrý týraly Qazaqstan Prezıdenti Nursultan Nazarbaevtyń bastamasyn iske asyrýǵa resmı turǵyda jol ashyp berip otyr.
R.Joshybaev Qazaqstan elordasynda EKSPO-ny laıyqty deńgeıde ótkizý týraly respýblıkamyzdyń shynaıy nıetin rastady, osy baǵytta daıyndyq jumystaryn uıymdastyrý boıynsha Qazaqstan Úkimeti qabyldaǵan sharalar týraly habarlady: «EKSPO-2017» saılaýaldy naýqany jónindegi uıymdastyrý komıteti qurylǵan, qazaqstandyq ótinimdi uıymdastyrý jáne ilgeriletý jónindegi ulttyq úılestirýshiniń qyzmet orny bekitilgen, tıisti mınıstrlikterde, vedomstvolarda jáne elorda ákimdiginde osy másele boıynsha shtabtar qurylǵan, kórmege qatysýshy elderdiń kórme pavılondaryn ornalastyrý úshin jer ýchaskeleri bólingen.
V.Lossertales Qazaqstan tarapynyń qabyldaǵan sharalaryna qanaǵattanǵandyǵyn bildire otyryp, Astananyń birqatar basymdyqtaryna nazar aýdardy. Onyń pikirinshe, Ortalyq Azııa aýmaǵyna tuńǵysh ret kórme qozǵalysynyń taralýy mańyzdy bolyp kórinedi. Sondaı-aq, ol eldiń orasan zor ekonomıkalyq jáne ǵylymı áleýeti bar ekenin, onyń damý ıgiligi úshin paıdalanylyp jatqan kúsh-qýaty men qarqynyn atap kórsetti. Bas hatshynyń sózi boıynsha, Qazaqstan óziniń halyqaralyq bedelin nyǵaıta otyryp, óńirlik iri forýmdardyń kópshilik moıyndaǵan ortalyǵyna aınalýda. Kórmeniń usynylyp otyrǵan taqyryby – «Bolashaq energııasy» orasan zor tabıǵı energııa qorlary bar jáne jahandyq qaýipsizdik pen turaqtylyq jolynda bolashaq urpaq úshin balamaly energetıkany damytyp otyrǵan memlekettiń osy bir jalpy dúnıejúzilik problemany aldyńǵy kezektegi josparǵa ilgeriletýine baılanysty nyshandyq jáne ózekti mánge ıe.