Otan degen uly kúsh, berik qorǵan

Qostanaıda Qazaqstan Pat­rıottarynyń forýmy ótkende delegattar osyndaǵy ýnıversıtet aldynda ult ustazy Ahańa – Ahmet Baıtursynovqa ornatylǵan eskertkishke gúl shoqtaryn qoıyp taǵzym etti. Qazaq óziniń tarıhynda nebir zobalańdy basynan keshti. 1915 jyly osy Ahań “álhamdýllla, bizdiń qazaq alty mıllıonǵa jetti” dep qudaıǵa shúkirshilik etken eken. Zamana jeli bir aı­nalyp soqqanda qazaq dala­sy­na kelgen ashtyq eldi qynadaı qyryp ketti. Muny Keńes óki­meti qoldan jasady deýge áb­den bolady. Aınaldyrǵan jıyr­ma jyldyń ishinde ash­tyqtyń sońyn úskirik bolyp urǵan repressııa ultymyzdyń qaımaǵyn sypyryp aldy. Elde qazaq eki mıllıonǵa jetpeıtindeı kezeńge tústik. “Qazaqty eshkimge bodan qylmaımyz, jeke el bolamyz” dep armandaǵan Alash bozdaq­tary keńestik qandy máshı­ne­niń sheńgeline ilikkende qaıran Ahań “bárimiz birdeı opat bolmaıyq, erteń de isimizdi jal­ǵastyrar rýhy myqty azamattar kerek”, dep Muhtar Áýezov bas­taǵan zııaly­lary­myzdy saqtap qalýdyń bar ama­lyn jasaǵan. О́zgege bodan bolýdan, moı­yn­ǵa qamyt ilýden, óz erki ózinde bolmaýynan qazaq osyndaı azap shekken. Ahańnyń eskertkishiniń túbin­de Muhtar Áýezovtiń: “El bola­myn deseń besigińdi túze”, degen ataly sózin eske alyp turyp, sol uly maqsattyń oryndalyp kele jatqanyna qýandyq. El ósti. О́shkenniń orny jan­dy. Bodan kezinde qynadaı qy­rylǵan qazaq Táýelsizdiginiń 20 jyldyǵynda álemdegi jetekshi elderdiń birine aınaldy. Kórshi elder Qazaqstanǵa qarap boı tú­zeıtin boldy. “Qazaq bolý baqyt qoı” degendi estip júrmiz. Osy­nyń bárine Kóshbasshymyz, El­ba­symyzdyń syndarly saıa­sa­­ty­nyń arqasynda jettik. Qostanaıdaǵy forýmda osy­­nyń bári oı eleginen ótki­zildi. Jú­rek terbeıtin sózder aıtyl­dy. Memlekettik rámiz­der ulyq­tal­dy, olardyń av­tor­larymen kezdesýler ótki­zildi. Kópshilikke jarııa etilmegen kedergiler jaıynda da estidik. Táýelsizdik qazaqqa ońaı kel­gen joq. Búgingi jastar osy­ny tereń túsinýi kerek. “Biz patrıot­pyz” degen jalań aıqaı, daýryq­pa uranmen jurt otanshyl bolyp ketpeıdi. Qa­zaq­standy qazaqtan bólek osyn­da jaılaǵan etnos ókilderi de shyn júregimen mem­leketim dep qabyldap, jú­regimen súıýi kerek. Ardager urpaq, myna bizder, bizdiń qatarymyz aqyl aıtyp qana qoımaı, óz isimizben úlgi bolýymyz kerek dep oılaımyn. Qostanaıdaǵy forým myń­daǵan júrekterdiń óz Otanyna degen mahabbatyn eseledi, óz Otanyndaı qymbat atameken esh jerde bolmaıtyndyǵyn túsindirdi dep oılaımyn. Jeńisbek MÁÝLENQULOV, oblystyq ardagerler keńesiniń tóraǵasy, forým delegaty. Shymkent.