Keshe Aqordada Memlekettik hatshy Qanat Saýdabaevtyń tóraǵalyǵymen Ǵylym men tehnıka salasyndaǵy Qazaqstan Respýblıkasy Memlekettik syılyǵyn berý jónindegi komıssııanyń otyrysy ótti.
Otyrysta joǵary marapatqa usynylǵan jumystar boıynsha taqyryptyq seksııalardyń usynymdary men memlekettik ǵylymı-tehnıkalyq saraptamanyń qorytyndylary qaraldy.
Qazaqstan Respýblıkasy Táýelsizdiginiń 20 jyldyǵynda Ǵylym men tehnıka salasyndaǵy Otanymyzdyń Memlekettik syılyǵyn alýǵa nomınanttardy retteý bizdiń komıssııaǵa erekshe jaýapkershilik júkteıdi, dedi Qanat Bekmyrzauly. Ol budan keıin: biz usynylǵan jumystardy baǵalaýda erekshe prınsıpti bolýymyz jáne Memlekettik syılyq beriletin Jarlyqta Prezıdent Nursultan Nazarbaev kórsetken joǵary krıterıılerdi basshylyqqa alýǵa tıispiz. Bul krıterıılerdiń anyq jáne naqty ekeni belgili. Memlekettik syılyqtan úmitker árbir jumys aldymen otandyq ǵylymda serpindi bolýy, óz salasynda álemdik analogtarǵa sáıkes nemese odan da joǵary turýy jáne eldiń ǵylymı-tehnıkalyq damýyna eleýli úles qosýy tıis. Sondyqtan ǵylym men tehnıka salasyndaǵy Qazaqstan Respýblıkasynyń 2011 jylǵy Memlekettik syılyǵy tek Otanymyzdyń joǵary nagradasy ǵana emes, elimizdiń odan ári ǵylymı-tehnıkalyq progresiniń mańyzdy kórsetkishi bolýy tıis. Bizdiń mindetimiz – Memleket basshysyna usynylǵan jumystardyń ishinen Memlekettik syılyqty berý úshin naǵyz laıyqty eńbekterdi usyný, dep atap ótti.
Otyrys qorytyndysy boıynsha ǵylymı-tehnıkalyq saraptamadan jáne komıssııa seksııalarynda aldyn ala qaraýdan ótken jumystar iriktelip alyndy. Irikteýden ótken jumystardyń tizimi odan ári keńinen qoǵamdyq talqydan ótkizý maqsatynda «Egemen Qazaqstan» jáne «Kazahstankaıa pravda» gazetteriniń jaqyn aradaǵy nómirlerinde jarııalanatyn bolady.
Súleımen MÁMET.