Mereıtoıǵa rýhanı tartý

Keshe «Qazaqstan» Ortalyq konsert zalynda ótken Shanhaı yntymaqtastyq uıymynyń 10 jyldyǵyna arnalǵan  merekelik konsertke el Prezıdenti Nursultan Nazarbaev ShYU-nyń sammıtine qatysýshy mártebeli meımandarmen birge keldi. Qazaqstan óner sheberleriniń merekelik shashýyn Reseı Prezıdenti Dmıtrıı Medvedev, QHR Tóraǵasy Hý Szıntao, О́zbekstan Prezıdenti Islam Karımov, Qyrǵyzstan Prezıdenti Roza Otýnbaeva, Tájikstan Prezıdenti Emomalı Rahmon, Aýǵanstan Prezıdenti Hamıd Karzaı, Pákstan Prezıdenti Asıf Álı Zardarı, taǵy basqa mártebeli qonaqtar tamashalap, delegasııa basshylary atynan ónerpazdarǵa sebet toly gúl shoqtary tartý etildi. Táýelsizdik jyldarynda el­or­da eńsesin bıiktetken birtalaı mádenıet oshaqtary qalansa, so­nyń ishinde álemdik talǵamǵa saı boı túzegen «Qazaqstan» Orta­lyq konsert zalynda búginde mine, Qazaq elin damýdyń dańǵyl jolyna túsken memleket retinde tanyp, alqaly jıynǵa kelip jat­qan mártebeli qonaqtarǵa ónerdiń túrli óriminen ónege kórsetilýde. Sahnada Qurmanǵazy atyndaǵy Qa­zaq memlekettik akademııalyq halyq aspaptary orkestri (dırıjeri Jalǵasbek Begendikov) ataq­ty  «Saryarqa» kúıin quıqyl­jyt­qanda, tylsymnyń tynysy ashylǵandaı. Ekranda – qyran qusy qalyqtaıdy. Ejelden erkindik ańsaǵan qazaq dalasynyń tó­besinde beıbitshilik qyrany samǵap, baıtaq eldiń tynyshtyq kúzetshisindeı sholady. Ármen qaraı ShYU-nyń on belestegi jylnamasy paraqtalyp, memleket basshylarynyń lebizderi ja­zylǵan kórinister usynyldy. Fı­lm­nen keıin K.Baıseıitova atyn­daǵy ulttyq opera jáne balet tea­trynyń balet trýppasy N.Ti­len­dıevtiń «Ata tolǵaýy» kúıi negizinde ázirlegen bıin oryn­dady. Osy keshtiń árin ash­qan «Serper» dom­byrashylar an­sambliniń tany­mal kúılerden úzindi keltirgen ǵa­jaıyp nómiri tańdaı qaqtyrdy. Saltanatty konserttiń shy­myl­dyǵyn halqymyzdyń qasıet­ti kúı ónerimen ashyp, tól dás­túr­di tórge ozdyrýdyń sebebi qa­za­q­ty ózge jurtqa etene tanys­ty­rý nıetinen bolar dep bol­jaı­myz. KSRO halyq ártisi Álibek Dinishev Abaıdyń «Aıttym sá­lem, Qalamqas» ánin shyrqaǵanda zal ishi siltideı tunyp, uıydy. ShYU-ǵa múshe elderdiń qur­me­tine ózbektiń «Lıazgi» bıin «Saltanat» ansambli, qyrǵyzdyń ha­lyq áni «Jylqyshyny» Qaraqat Ábildına, tájiktiń halyq áni «Lalı Badahshondy» Sıtora men Parvız Nazarovtar, qytaıdyń ha­lyq áni «Vo aı nı Djýngony» Gúlzıra Bókeıhan, orystyń ha­lyq ánderinen popýrrıdi Talǵat Musabaev, Oleg Tatamırov pen Súndet Baıǵojın oryndap, sheberlikterin pash etti. Klas­sıka­lyq janrdan Mosarttyń «Rondo Alla Turka» shyǵarmasyn oryn­daǵan Gúlzııa Stambek, Ásel Nur­ke­nova, Sadjana Myrzalıeva, Ásel Raqymjan men Ázıza Beı­senǵulova syndy jas prıma qobyzshylardyń ónerleri órshil rýhta tanylsa, E.Lloıd-Ýeb­ber­diń «Opera elesi» mıýzıklinen kórinisti sahnaǵa alyp shyqqan Qa­zaqstannyń halyq ártisi Nur­jamal Úsenbaeva men Medet Cho­ta­baevtyń joǵary deńgeıdegi óne­ri eshkimdi beı-jaı qaldyr­mady. P.I. Chaıkovskııdiń «Aqqý kóli» baletinen «Adajıony» Gaý­har Ýsına men Jandos Áý­b­áki­rov múltiksiz jetkizse, «Dala bulbuldaryn» oryndaǵan Já­mı­la Baspaqova, Bıbigúl Januzaq pen Jámıla Jarqymbaevanyń daýystary túrli maqammen qu­by­la órilip, áserli shyqty. S.Er­kimbekovtiń «Atameken tańy» sımfonııalyq shyǵarmasyn oryn­daǵan jas skrıpkashylar óneri­nen min tappaısyz. «Eligaı» balalar hory N.Nazarbaev pen A.Qorazbaevtyń «Úsh qońyr» ánin shyrqaǵanda, móldir bulaq­taı tunyq daýystar syńǵyrlady. «Qazaqstan» ánimen sharyqtaǵan merekelik konserttiń tarıhı shejiresinde el mereıin ósirer aıshyqty better qaldy. Qarashash TOQSANBAI.