59 «Altyn belgi» ıegeri, 33 úzdik túlek qanat qaqty!

O.Jáýtikov atyndaǵy respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternatynyń túlekteri bıylǵy UBT synaǵyn joǵarǵy kórsetkishpen támamdady. Mektep boıynsha ortasha ball – 109,4. Al 59 shákirt «Altyn belgi» synynan súrinbeı ótip, 33 shákirt úzdik attestat ıegeri atandy. Byltyrǵy kórsetkish boıynsha mekteptiń 88 túlegi «Altyn belgi» men erekshe úlgidegi kýálikke ıe bolsa, bıylǵy nátıje – 92 úzdik túlek. Qyryq jylǵa jýyq tarıhy bar kıeli bilim ordasynan túlep ushqan shákirtter búginde álem­niń aıtýly oqý oryndarynda bilim alýyn jalǵastyryp jatyr. Sonymen qatar byltyr 33 túlek Prezıdent Nazarbaev atyndaǵy ýnıversıtettiń stýdenti atandy. O.Jáýtikov atyndaǵy RMFMOMI túlekteriniń aldaǵy ýaqytta da Qazaqstan ǵylymy men ekonomıka­syn, saıasaty men mádenıetin jańa beleske kóteretin maman bolyp shyǵatynyna senim mol, sol sebepti de joǵary oqý oryndary tarapynan bul oqý ordasyn bitirýshige suranys artýda. Oǵan aı­ǵaq, QBTÝ men ál-Farabı atyn­daǵy QazUÝ osy RMFMOMI tú­lek­terine ataýly grant bólip otyr. «QazAtomProm» aksıonerlik qoǵamy Reseı men Fransııa­nyń joǵary oqý oryndarynda bilim alý úshin osy oqý ornyn bitirgen shákirtterge bilim grant­ta­ryn bóldi. Osyndaı úlken sapaǵa qol jetkizý jolynda akademık O.Jáýtikov atyn ıelengen bilim ustahanasy 17 elde ótken 31 halyqaralyq olımpıadadan 101 júldeli oryn, arnaıy dıplomdar men maqtaý qaǵazdaryn alsa, respýblıkalyq olımpıadadan 33 medal ıegeri men respýblıka­lyq ǵylymı joba jarysynan 12 jeńimpaz shákirt shyǵaryp otyr. Bıylǵy UBT synynda Ahmet Ermek pen Juman Qýanysh sekildi oqýshylardyń 124 balǵa ıe bolýy, taǵy da úsh shákirttiń 123 ball jınaýy atalmysh bilim ordasynyń deńgeıin tanytsa kerek. Bilimdar shákirt, degdar maman daıyndap shyǵaratyn oqý orny maýsymnyń 21-25 araly­ǵyn­da qabyldaý emtıhandaryn ótkizýdi josparlap otyr. Emtı­handardy qazaq jáne orys tilderin jetik biletin 8-9 synyp bitirýshi oqýshylar tapsyra alady. Eli­mizdiń ózge oblystarynan, shal­ǵaı aýdandarynan kelgen úmitkerlerge tegin jataqhana da qarastyrylǵan. Bir sózben aıt­qan­da, bilimimdi shyń­daımyn, talabymdy ushtaı­myn degen izdenimpaz jas býyn úshin baqty bir synap qalatyn múmkinshilik bar. Qanat ESKENDIR, Almaty.