«Isker» ortalyǵynda Til komıteti «Memlekettik onomastıka komıssııasynyń jumysyn jetildirý» atty dóńgelek ústel ótkizdi. Onda onomastıka máseleleri boıynsha zań aktilerine ózgerister men tolyqtyrýlar engizý týraly zań jobasy qaraldy.
Dóńgelek ústel barysynda onomastıka salasyndaǵy normatıvtik-quqyqtyq bazany jetildirý jaıy talqylandy. Onomastıkalyq jumystyń quqyqtyq negizderin, qoldanylý tetigin jáne iske asyrý nysandaryn ázirleý máselesi kóterildi.
Dóńgelek ústelge qatysqan Mádenıet vıse-mınıstri Ǵazız Telebaev kóshe, jer-sý, aýdan, aýyl attaryn qoıýda rýlyq-atalyq ataýlardyń bolmaýyn, ondaı ataý qoıýǵa óte muqııat bolý kerektigin aıtyp ótti. Oblystan, jergilikti jerlerden kelgen usynystardy respýblıkalyq komıssııa qaraýy kerek, dedi ol.
Al Baılanys jáne aqparat mınıstrliginiń Ulttyq aqparattyq tehnologııalary komıtetinen kelgen ókil elektrondy úkimet baǵdarlamasy boıynsha adrestik tirkelim týraly aıtyp ótti. Ol adrestik tirkelim úshin ataýlardyń birkelkiligi mańyzdy ekendigin, keıbir jerlerde 4 áripten turatyn Abaı ataýynyń ózi 4 túrli kezdesetinin tilge tıek etti. Tipti keıbir jerlerde hýtorlar bar. Alaıda. olardy aqparattyq júıege salǵan kezde qıynshylyq týǵyzady. Sońǵy 20 jyl ishinde ár oblys ártúrli ataý mánerine túsip aldy. Keıbir 50 adam turatyn aýyldar adrestik tirkelimge engizilmeı qaldy. Bul durys emes. Qazaqstannyń demografııasyn eseptesek, kóshi-qon bar, ıaǵnı adamdar keıin qonystanýy arqyly kóbeıýi múmkin. Sondyqtan olardy da esepke alyp, tirkeýimiz qajet, dedi ol.
Alqaly otyrysta Aqmola, Aqtóbe, Jambyl oblystyq tilderdi damytý basqarmalary onomastıka bólimderi basshylarynyń baıandamalary, sondaı-aq Astana men Almaty qalalary mamandarynyń pikirleri tyńdaldy.
Venera TÚGELBAI.