Ofıserler, sapqa tur!

Ulttyq qorǵanys ýnıversıtetin kezekti tyńdaýshylar bitirip shyqty. Bıylǵy 63 bitirýshi «Magıstr» akademııalyq dáre­je­sinde «Áskerı jáne ákimshilik basqarý», «Áskerı bilim», «Teh­nıkalyq qamtamasyz etýdi bas­qarý», «Tyldyq qamtamasyz etýdi basqarý», «Tárbıe, áleýmet­tik-quqyqtyq úderisterdi bas­qa­rý» mamandyqtaryn ıgerip shyǵyp otyr. Olardyń arasynda tórt ofıser oqýdy ozat bitirdi. Olar – podpolkovnıkter Rýslan Kokıshev, Jandar Áshirbekov jáne maıorlar Sergeı Arys­tan­baev, Murat Shaqaev. Bul jerde tek Qorǵanys mınıstrliginiń ofıserleri ǵana bilim almaıdy. Sonymen qatar, basqa da áskerler men áskerı quralymdardyń ókilderine de oqýǵa múmkindik jasalǵan. Ujym­dyq qaýipsizdik sharty uı­ymyna kiretin kórshiles Tájik­stan Respýblıkasy men Qyrǵyz Respýblıkasynyń áskerı qyz­metshileri de osynda oqıdy. Ulttyq qorǵanys ýnıversıteti Qazaqstan Respýblıkasy Qa­rýly Kúshteri Áskerı akade­mııasynyń bazasynda qurylǵan. 1997 jyly Qazaqstan Res­pýb­lıkasy Prezıdentiniń Jar­ly­ǵymen Almaty joǵary áskerı ýchılıshesi QR QK Áskerı aka­demııasy bolyp qaıta qurylǵan bolatyn. Keıin, 2003 jyly «Ult­tyq qorǵanys ýnıversıteti» memlekettik mekemesi bolyp qaıta ataldy. Bul joǵary oqý ornynyń búgingi tańdaǵy negizgi tapsyr­ma­sy áskerı mamandarǵa magıstratýra, adıýnktýra boıynsha ǵylymı-pedagogıkalyq joǵary áskerı bilim berý bolyp taby­lady. Sonymen birge, joǵary áskerı bilimdi mamandardyń biliktiligin arttyrý, olardy jo­ǵa­ry akademııalyq kýrstarda kýrs­tyq daıyndyqtan ótkizý, áskerı ǵylym salasyndaǵy ǵylymı izdenisterge jaǵdaı jasaý. Ulttyq qorǵanys ýnıversıteti – Ortalyq Azııa aımaǵyn­daǵy ofıserlerge joǵary áske­rı bilim beretin, Qarýly Kúshter men basqa da áskerler men ás­kerı quralymdar úshin maman­dar­dy qaıta daıyndaýdy júzege asyratyn birden-bir oqý orny. Oksana PARPÝRA. ---------------------------- Sýretti túsirgen Ermek SARBASOV.