Izraıl qorǵanys mınıstri Ehýd Barak Sırııa prezıdenti Bashar Asadtyń rejimi oppozısııaǵa ári ketse jarty jyl ǵana tótep beredi dep málimdedi. Men B.Asad otstavkaǵa qaraı baǵyt alyp barady dep esepteımin, dedi E.Barak.
Mundaı pikirdi Túrkııa prezıdenti Abdýlla Gúl de bildirdi. Onyń sózine qaraǵanda, B.Asad el ishindegi qarsylyqtardy basý úshin «kúshti artyq» paıdalanǵan. Sonyń saldarynan kóptegen qurbandyqtarǵa jol berildi. Al keshe B.Asad elde reformalar júrgiziletinin jarııa etti. Sırııa halqy muny kesh áreket dep baǵalady. Keıbir derekterge qaraǵanda, Sırııadaǵy tolqýlar bastalǵaly beri myńnan astam adam kóz jumǵan.
KEZEKTI TRANSh ÚShIN ShART QOIYLDY
Álemdik qarjy-ekonomıkalyq daǵdarystan eńse tikteı almaı jatqan eldiń biri – Grekııa. Endi Eýroodaq elderi Afınaǵa ekonomıkalyq kómek baǵdarlamasy sheńberinde 12 mıllıard eýro bólýdi josparlap otyr. Biraq qarjy mınıstrleri aqsha bólýdiń shartyn da naqtylap berdi.
Eger Grekııa parlamenti osy aıdyń sońyna deıin bıýdjet shyǵyndaryn 28 mıllıard eýroǵa qysqartý baǵdarlamasyn maquldap, buǵan deıin úkimet qabyldaǵan ekonomıkalyq reformalar josparyn qoldaǵan jaǵdaıda shilde aıynyń alǵashqy jartysyna deıin Grekııaǵa joǵaryda atalǵan soma kóleminde besinshi transh usynylatyn bolady. Búginde el úkimeti eki ottyń ortasynda qalyp otyr. О́ıtkeni, bıýdjetti qysqartý baǵdarlamasyna halyq qarsy.
SYRTTAI 35 JYLǴA ÚKIM ShYǴARYLDY
Týnıste sot eldiń burynǵy prezıdenti Zın ál-Abıdın Ben Álı men onyń zaıyby Leıla Trabelsıge syrttaı úkim shyǵardy. Erli-zaıyptylarǵa memleket múlkin urlady degen aıyp taǵylyp, árqaısysy 35 jylǵa bas bostandyqtarynan aıyryldy.
Sot sondaı-aq Ben Álı 25 mıllıon eýro, al Trabelsı 20,5 mıllıon eýro aıyp tóleýleri tıis dep sheshti. Is bir-aq kúnde qaralyp, sheshim shyǵaryldy. Sottalǵandardyń múddesin sot taǵaıyndaǵan memlekettik advokattar qorǵady. Ben Álıge qatysty taǵy bir qylmystyq is – esirtki men qarý-jaraqtyń zańsyz aınalymyn qaraıtyn májilis 30 maýsymǵa shegerildi.
QOǴAMDASTYQ QORYNAN QARJY AÝDARYLDY
EýrAzEQ-tyń daǵdarysqa qarsy qorynan Mınskige bólingen alǵashqy turaqtandyrýshy nesıeniń transhy aýdaryldy. Bul týraly Reseı qarjy mınıstri Alekseı Kýdrın habarlady. Ol sondaı-aq transhtyń jalpy kólemi 800 mıllıon dollardy quraıtynyn atap ótti.
A.Kýdrınniń aıtýynsha, Belorýssııa transhqa qajetti barlyq mindettemelerin oryndaǵan. El basshylyǵy EýrAzEQ-pen qatar, birneshe mıllıard dollar nesıe bólýdi surap, Halyqaralyq valıýta qoryna da shyqqan bolatyn. Biraq HVQ ázirshe naqty sheshimge kele almaı otyrǵan sııaqty. Onyń talaby da joǵary bolýy yqtımal.
TÝ-134 UShAǴY APATQA UShYRADY
«RýsEır» avıakompanııasynyń Máskeýden Petrozavodskige ushyp shyqqan Tý-134 jolaýshylar ushaǵy Petrozavodsk áýejaıyna qonýǵa bir shaqyrym qalǵanda apatqa ushyrady. Laınerdiń bortynda ekıpaj múshelerin qosa eseptegende 62 adam bolsa, 44-i qaza tapty. Ishinde 7 bala bar.
Apattyń sebepteri týraly ártúrli boljamdar aıtylǵanymen, naqty jaǵdaı «qara jáshikter» oqylǵannan keıin anyqtalatyn bolady. Al alǵashqy úsh sebep retinde adam faktory, aýa raıy jaǵdaıy jáne tehnıkanyń buzylýy kóldeneń tartylǵan edi. Apatqa baılanysty qylmystyq is qozǵalyp úlgerildi.
IRAKTA TYNYShTYQTYŃ AÝYLY ALYS
Iraktyń Ál-Dıvanııa qalasynda jarylǵysh zattar salynǵan eki avtokólik jaryp jiberildi. Lańkestik áreket Kadısııa provınsııasy gýbernatorynyń rezıdensııasy aldynda jasaldy. Terakt saldarynan 25 adam opat bolsa, 30 adam túrli deńgeıde dene jaraqatyn alǵan.
Jarylystardan Kadısııa gýbernatorynyń zardap shekken-shekpegeni belgisiz. Buǵan deıin Baǵdadta jasalǵan taǵy bir jarylystan Fransııa elshiliginiń kortejindegi jeńil kólik zaqymdanǵany, jeti adam jaralanǵany týraly habarlaǵan bolatynbyz. Osylaısha Irakta soǵys resmı túrde ótken jyldyń jazynda aıaqtaldy dep sanalǵanymen, lańkestik áreketter tyıylar emes.
QYSQA QAIYRYP AITQANDA:
* Reseı Federasııasynyń Kommýnıstik partııasy men Reseı Lıberal-demokratııalyq partııasy prezıdent D.Medvedev pen premer-mınıstr V.Pýtınge 2012 jylǵy prezıdenttik saılaýǵa kandıdattar retinde qatysýdy usyndy. Mundaı jaǵdaıda, deıdi partııa serkeleri G.Zıýganov pen V.Jırınovskıı, saıası úderiste básekelestik paıda bolar edi.
* Eýroodaq Belorýssııaǵa qarsy taǵy bir sanksııa engizdi. Oǵan eldegi tez nasharlap ketken adam quqy jónindegi jaǵdaı sebep bolǵan. Ústimizdegi jyldyń qańtarynda EO 188 belarýs sheneýinigine, ishinde prezıdent A.Lýkashenko da bar, Odaq elderine kirýge tyıym salyp, sanksııa engizgen edi.
* Ýkraına NATO ókilderimen óziniń syrtqy saıasaty qaǵıdattaryn talqylaý nıetinde kórinedi. Bul másele boıynsha eki kezdesý ótkizý josparlansa, alǵashqysynda Ýkraınanyń syrtqy saıasaty qaǵıdalary, ekinshisinde syrtqy saıası strategııa qaǵıdalary talqylanbaq eken.
* Tbılısıdiń qalalyq soty jaqynda Grýzııa astanasynda oryn alǵan narazylyq aksııalaryn daıyndap jáne oǵan qatysqan parlamenttiń eks-spıkeri Nıno Býrdjanadzeniń jubaıy Badrı Bısadzeni tutqyndaýǵa sanksııa bergen. Buǵan deıin Bısadzeden 60 myń dollar kepildik tóleý talap etilse, ol odan bas tartqan.
Internet materıaldary negizinde ázirlendi.