Bıaǵanyń jerlesteri óner ozdyrdy

Oblys kórkemónerpaz­dary­nyń qorytyndy konserti ótti. Jyl basynan beri óńirdegi 20 aýdan men qalada jergilikti baı­qaýlar ótken bolatyn. Oǵan aý­yl­dardan 12 myńnyń syrtynda óner­pazdar qatysty. «El ishi – óner kenishi» degen, aýyl ara­synan aty ozǵan ánshiler men bıshiler, kúı­shiler Qostanaıda óner jarys­tyrdy. Qorytyndy kon­sert­tiń ózine oblystyń ár shal­ǵaıynan 836 ónerpaz keldi. Mań­daıyn kún qaqqan dıqan men malshynyń, ken qazǵan kenshiniń baılyq tek qo­lynda ǵana emes, kókireginde eken. Oblys orta­ly­ǵynyń tal­ǵam­paz jurtshylyǵy tuma bu­laq­taı taza ónerdi tama­shalady. – Bıylǵy konsert jyldaǵy­dan ónerpazdardyń kásiptik deń­ge­ıiniń joǵarylaýymen erekshelendi. Oblys ortalyǵynan on sa­ǵat júrip jetetin Jangeldın aýdanynan kelgen Raıa Álimbaeva «Aqqý» kúıin shertkende zal dýyldap turyp ketti. Kórmeısiz be, ónerdiń qudiretin! Kásiptik deńgeı dep osyny aıt. Qostanaı aýdanynan kelgen «Ǵajaıyp are­nasy» atty sırktik qoıylym da kórermenderdi tańdandyrdy. Ji­tiqaralyq, arqalyqtyq bıshiler de tamsandyra bildi. Barlyq aýdandar men qalalardan kelgen óner ujymdarynyń sahnalyq kostıýmderi jańartylǵan. Sahna sulýlyqtan janyp turdy, – deıdi oblystyq mádenıet basqarma­sy­nyń bastyǵy Marıonela Slesar. Jergilikti jerlerdegi óner­paz­dar baıqaýy kezinde sahnany bezendirýge de qazylar alqasy úlken mán bergen bolatyn. Gala konsertte jańadan eshnárse oı­lap tappaı-aq, Sarykól, Qos­tanaı aýdandarynyń úzdik sah­nalyq bezendirýleri paıdala­nyl­dy. Sahnada barlyǵy onnan asa óner janry usynyldy. Degenmen, baıqaýdyń aty – baıqaý. Onda júırikten júırik ozatyny aqıqat. Bul joly Gran prı júl­desin Taran aýdanynyń ónerp­az­dary – Bıaǵanyń jerlesteri qanjyǵalady. Tarandyqtar or­yn­daǵan ánder men bıler kásibı deńgeıiniń joǵarylyǵymen, tal­ǵamǵa saı sahnalyq kostıýmderimen, janrlarynyń ár alýan­dyǵymen kórermenniń de, qazy­lardyń da kókeıinen shyǵa bildi. Olar oblys ákiminiń júldesi «Ga­zel» kóligin minip qaıtty. Al birinshi oryndy Qostanaı, Uzynkól aýdandary men Ar­qa­lyq qalasy bólisti. Ekinshi oryn Jangeldın, Jitiqara, Áýlıekól aý­dandary men Rýdnyı, Qostanaı qalalarynyń enshisine tıdi. Úsh­inshi orynǵa Meńdiǵara, Qarasý, Amangeldi aýdandary men Lısakov qalasy ónerpazdarynyń eń­begi laıyq dep tabyldy. Názıra JÁRIMBETOVA. Qostanaı.