Kóshpeli jıyn kósheli sóz aıta aldy ma?

Almatyda S.J.Asfendııarov atyndaǵy Qazaq ulttyq medısına ýnıversıtetinde Salıdat Qaıyrbekovanyń tóraǵalyq etýimen Densaýlyq saqtaý mınıstrliginiń keńeıtilgen kóshpeli alqa otyrysy bolyp ótti. Onyń ju­mysyna respýblıkalyq medısına mekemeleriniń bas dárigerleri, res­pýb­lı­kalyq sanepıdstansa jetekshileri, oblystyq jáne Astana, Al­maty den­saýlyq saqtaý basqarmalarynyń basshylary, densaýlyq saqtaý júıesindegi respýblıkalyq ǴZI dırektorlary, Medısınalyq jáne far­masevtıkalyq qyzmetti baqylaý komıtetiniń ókilderi qatysty. Alqaly jıynǵa Almaty qalasynyń ákimi Ahmetjan Esimov te keldi. Kún tártibindegi birinshi másele – medı­sınalyq kómektiń sapasy, 2011 jyldyń 12 mamyryndaǵy Qazaqstan Respýblıkasy Pre­zıdentiniń hattamalyq tapsyrmasyna sáıkes lısenzııalaý, tegin medısınalyq kómek kór­setýdiń aýqymy boldy. Bul taqyryp boı­ynsha Densaýlyq saqtaý mınıstrligi Medı­sınalyq jáne farmasevtıkalyq qyzmetti baqylaý komıtetiniń tóraǵasy N.Beısen baıan­dama jasap, qaladaǵy búgingi densaýlyq saqtaý salasynyń jetistikteri men kemshilikterine toqtalyp ótti. Sondaı-aq Almaty qalalyq densaýlyq saqtaý basqarmasynyń bastyǵy E.Dúrimbetov qala turǵyndaryna kepildik berilgen tegin medısınalyq kómek kó­le­min qamtamasyz etý, júrek-qan tamyr­lary, onkologııalyq, júıke jáne nashaqor­lyq dertine shaldyqqan naýqastarǵa medısı­nalyq kómek kórsetetin beıindi qyzmetter­diń pro­ble­malary men olardy sheshý jol­da­ry, so­nymen qatar qan qyzmeti jáne salam­at­ty ómir saltyn qalyptastyrý qyzmetiniń jumys­tary jaıly málim etti. Aǵymdaǵy jyly qalada bala týýdyń tu­raqty joǵary deńgeıi (1000 turǵynǵa 27,2), almatylyqtardyń tabıǵı ósimi (1000 tur­ǵyn­ǵa 18,6) qamtamasyz etildi. 2011 jyldyń 5 aıy ishinde ana ólim-jitim deńgeıi (100 myńǵa shaqqanda 27,3-ten 21,0-ge deıin) jáne bala ólim-jitimi kórsetkishi (100 myń­ǵa shaqqanda 17,1-den 16,6-ǵa deıin) tómen­de­di. Almaty qalasynda stasıonarlyq járdem kórsetetin 40 medısınalyq uıym jáne sta­sıo­nardy almastyratyn 55 uıym kepildik berilgen tegin medısınalyq kómek kólemi boı­ynsha qyzmet kórsetedi. 2011 jyly Almatyda stasıonarlyq jáne stasıonardy almastyratyn kómek kó­le­min qarjylandyrý kólemi 2009 jylmen salystyrǵanda, 59 paıyzǵa artty (2009 jy­ly 8,3 mlrd. teńge bolsa, 2011 jyly 13,2 mlrd. teńgege jetti). Jalpy respýblıkalyq jáne vedomstvalyq emhanalardy qosa eseptegende bul kórsetkish 22,9 mlrd. teńgeni quraıdy. 10 jyldyń ishinde kepildik berilgen tegin medısınalyq kómek kólemin qarjylandyrý 12,2 esege ulǵaıǵan. Ekinshi másele – densaýlyq saqtaý bas­qar­malarymen jáne komıtetterdiń aýmaqtyq departamentterimen ózara is-árekette den­saý­lyq saqtaý salasynyń beıindi qyzmette­riniń jumysyn jetildirý boldy. Bul boı­ynsha Densaýlyq saqtaý vıse-mınıstri E.Baı­júnisov, «Ulttyq medısınalyq holdıng» AQ basqarma tóraǵasy E.Birtanov, sondaı-aq birqatar ǵylymı zertteý ıns­tı­týttary men ǵylymı ortalyqtardyń bas­shy­lary sóz sóılep, búgingi kóterilip otyr­ǵan máse­le­ler­ge qatysty óz oılaryn ortaǵa saldy. – Búginde respýblıkalyq deńgeıdegi kór­setkishterge nazar salsaq, birinshiden, tegin medısınalyq kómek alýda ár azamattyń aýrýhana men dárigerdi erkin tańdaýyna múm­kindik týdy, – dedi byltyrǵy jyly qa­byl­danǵan Biryńǵaı ulttyq densaýlyq saqtaý júıesiniń (BUDJ) nátıjesi qandaı degen saýalymyzǵa «Ulttyq medısınalyq holdıng» AQ basqarma tóraǵasy E.Bir­ta­nov. – Ekinshiden, BUDJ – joǵary medı­sınalyq kómektiń deńgeıin kóterip kele jatyr. Onyń sebebi, qarjylandyrý tásili ózgerdi. Máse­len, bizdiń Ulttyq holdıngke kiretin alty emdeý mekemesi de joǵary tehnologııadaǵy medısınalyq kómek kórse­tedi. Budan eki jyl buryn respýblıkalyq mekemelerde emdeletin bir naýqasqa 120 myń teńge kóleminde ǵana qarjy bólinetin. Ol jerde aýrýdyń kúrdeliligi eseptelmeıtin. Qazir bizdiń ınstıtýttarda keıde bir naýqasqa 4-10 mln. teńgege deıin qarajat jumsalady. Iаǵnı, BUDJ-nyń tarıftik tetigi bizge úlken múmkindik berip otyr. Buryn naýqastardy 120 myń teńgege jetkeninshe emdeýge tyrysqanmen, joǵary tehnologııa­lardy paıdalanýǵa múmkindigimiz bolmady. Qazir óte kúrdeli operasııalar jasaýdy tikeleı mınıstrlik arqyly sheshe alamyz. Bul BUDJ-nyń qarjylandyrýdaǵy eń tıimdi nátıjesi dep bilemin. Kóshpeli alqa otyrysynyń qorytyn­dy­synda turǵyndarǵa kórsetiletin kepildik berilgen tegin medısınalyq kómek kóleminiń sapasyn jáne qoljetimdiligin ári qaraı art­tyrý maqsatynda áleýmettik mańyzdy aý­rýǵa shaldyqqan naýqastarǵa medısınalyq kómek kórsetýde densaýlyq saqtaýdyń beıindi salalarynyń qyzmetterin jetildirý jó­ninde qaýlylar qabyldandy. Gúlzeınep SÁDIRQYZY. Almaty.