Astananyń týǵan kúnine oraı qala qonaqtary men turǵyndaryna arnalyp uıymdastyrylǵan merekelik dýmandar 6 shilde kúni álemdik sahna juldyzy, án padıshasy atanǵan Sara Braıtmannyń konsertimen jalǵasty. Al keshkisin respýblıkalyq «Saryarqa» velotreginde ótken merekelik keshke Mr. Black Star Tımatı, «Gradýsy», Quest Pistols, Arash, Jay Sean jáne ıtalııalyq dı-djeı Alex Gaudino men qazaqstandyq Dınara Sultan, Aıqyn, «Orda», «Rıngo» jáne «Ne vse skazano» toptary qatysyp, jınalǵan kópshilikke ónerlerin pash etti.
Qala kúnin este qalarlyqtaı ári qyzyqty ótkizý maqsatynda Astana ákimdigi barynsha daıyndalypty. Oǵan óziniń soprano daýysymen álemdi aýzyna qaratqan aǵylshyn ánshisi Sara Braıtmannyń jeke konsertpen kelýge kelisim berýi dálel. Ol óziniń asqan sheber soprano daýysynyń arqasynda álemge tanylyp, án padıshasy atanǵan ánshi. О́z shyǵarmashylyǵynda eki mýzykalyq baǵytty – ótken ǵasyrdyń klassıkalyq mýzykasy men sońǵy onjyldyqtaǵy «pop» janryn sheber úılestire bilgen Sara Braıtmannyń «Time To Say Goodbye» mýltıplatınaly án jınaǵy 1997 jyly 35 apta boıy Billboard jýrnalynyń klassıkalyq chartynan túspeıdi, sondaı-aq ol álemniń 21 elinde altyn júldege ıe bolady. Dál osy sátten bastap Saranyń esimi álemdi sharlap ketedi. Saranyń Andrea Bochellımen birlese án oryndaýy eń tańdaýly ári tez taralǵan sınglge aınaldy.
Astanalyqtar men elorda qonaqtarynyń kóńil-kúıin kóterýge berilgen múmkindik keńinen boldy. Merekelik konsertterge kirý bıletteri de qoljetimdi baǵada satyldy. Múshel jastan shyqqan Astananyń týǵan kúni osylaısha kezekti ret joǵary dárejede atalyp ótildi.
Venera TÚGELBAI.