E.Birtanov mınıstrliktiń osy maqsatta birneshe baǵytta jumys istep jatqanyn, sonyń biri aldymen sapaly quqyqtyq-normatıvtik baza qurý bolyp otyrǵanyn jetkizdi. Májiliste alǵash ret talqylanǵan bul zańnamada birneshe mańyzdy ózgertýler kózdelgen. Birinshiden, Áleýmettik saqtandyrý qoryn turaqtandyrý sheńberinde qordyń aktıvteri men qarjysy Ulttyq bank esepshotynda saqtalady. Ekinshiden, keıbir aýdarymdar mólsheri azaıtyldy. Máselen, jumys berýshiler úshin ár adamǵa aýdarylatyn jarna kólemi 2-den 1 paıyzǵa tómendetildi. Memleket tóleıtin jarna kólemi 4-ten 3,75 paıyzǵa azaıǵan. Sondaı-aq jańa sanattar engizildi. Máselen, múgedek bala qarap otyrǵan ata-ananyń bireýine, shet elden kelgen qandastarǵa 1 jyl kóleminde, elimizdegi shet eldik azamattardyń balalary men zeınetkerlerine memleket tarapynan jarna tólenedi. Sonymen birge kelesi jyly 1 qańtardan bastap ózin-ózi jumyspen qamtyp otyrǵan azamattar eń tómengi jalaqy kóleminen 5 paıyz tólese (aı saıyn 1400 teńge) barlyq medısınalyq saqtandyrýǵa qol jetkize alady. Aldaǵy ýaqytta Dúnıejúzilik bankten 80 mıllıon AQSh dollary kóleminde qaryz alynbaq. Bul qarjy negizinen MÁMS júıesin qoldaýǵa, túrli medısınalyq qural-jabdyqtar alýǵa jumsalady.
– 5 sáýirden bastap elimizdegi emhanalarǵa tirkelý naýqany bastaldy. Búginde 120 myńnan astam adam emhanada tirkeýden ótti. Elimizdiń barsha azamaty elektrondy úkimet nemese emhana arqyly MÁMS júıesindegi mártebesin bile alady. Bul naýqan bıylǵy 1 shildege deıin jalǵasady, dedi mınıstr.
Sondaı-aq elimizdegi taǵy bir mańyzdy másele dári-dármek baǵasyn retteý ekenin aıtty. Atalǵan vedomstvanyń osy ýaqytqa deıin jeke menshik dárihanalardaǵy dári-dármek baǵasyn retteýge quqy bolǵan joq. Osy oraıda arnaıy ázirlengen zań jobasy jaqynda qoǵamdyq deńgeıde talqylanatyn bolady. Bul otandyq kásipkerlerdiń bıznesine de áser etetindikten, Ulttyq kásipkerler palatasy jáne basqa da uıymdarmen birge elekten ótkizip, aldaǵy kúzde Parlamenttiń qaraýyna usynylady. Úshinshi baǵyt – jeke medısınalyq uıymdarǵa jalpy medısınalyq qyzmetterdi kórsetý úshin teń jaǵdaı jasaý. Mundaı menshik nysanyndaǵy uıymdar kórsetkishi 34 paıyzǵa teń. Kóbiniń tegin medısınalyq kómek kórsetýge qoljetimdiligi sheshilmegen. Olardyń qyzmetine azamattar tikeleı ózi tóleıdi. Iаǵnı, erteń medısınalyq saqtandyrý júıesi engizilgende biz jeke menshik emhanalarǵa saqtandyrý paketi aıasyndaǵy medısınalyq qyzmetti kórsetýlerine múmkindik berýimiz kerek. Osy baǵytta ákimshilik kedergilerdi, qaǵazbastylyqty azaıtý boıynsha jumystar júrgizilýde, dedi E.Birtanov.
Sonymen birge medısınalyq týrızm elimiz úshin jańa baǵyt ekenin aıtqan Densaýlyq saqtaý mınıstri: Elimizde 8 myńdaı shet eldik azamat stasıonarlyq em qabyldaıdy. Olar negizinen Qazaqstanda turatyndar. Sondaı-aq 300-den astam shet eldik azamat Astana men Almaty qalalaryndaǵy joǵary tehnologııaly medısınalyq nysandarǵa jatqyzylady. Qazirgi ýaqytta kardıohırýrgııa, ortopedııa, reprodýktıvti sala boıynsha joǵary tehnologııaǵa súıenetin medısınalyq týrızmdi damytý baǵdarlamasyn ázirlep jatyrmyz. Bul tarapta otandyq medısınanyń áleýeti úlken, dedi.
Mınıstr ambýlatorlyq dárilermen qamtý baǵdarlamasyna 50 aýrý túri tirkelgenin, oǵan tegin dáriler bosatýǵa jyl saıyn 90 mıllıard teńge bólinetinin jetkizdi. Onyń 50 mıllıardy respýblıkalyq, qalǵany jergilikti bıýdjetten bólinedi. E.Birtanov dárilerdi satyp alý men jetkizý problemasy bar ekenin, onyń bir sebebi óńirlerde satyp alý prosesin jyl basynda bastaıtyndyǵynan týatynyn jetkizdi. О́ıtkeni, óńirlerde «SK-Farmasııa» AQ sııaqty erterek biryńǵaı dıstrıbıýterlik satyp alý quqyǵy joq. Sondyqtan Parlamentke usynylǵan zań jobasynda dári-dármekpen qamtamasyz etý men satyp alýdy ortalyqtandyrý júıesi jáne baǵasyn tómendetýdi logıstıka qyzmeti arqyly sheshý máseleleri qamtylyp otyr.
Dýman ANASh,
«Egemen Qazaqstan»