2014 jyldyń 27 tamyzyna deıin partııany basqaryp kelgen Rejep Taııp Erdoǵan sol kezdegi prezıdenttik saılaýǵa baılanysty partııa basshylyǵyn Ahmet Dáýitoǵlýǵa tapsyrǵan edi. A.Dáýitoǵlý bul laýazymda 2016 jyldyń kóktemine deıin bolyp, odan keıin partııanyń tizginin eldiń úkimet basshysy Bınaly Iyldyrym ustady.
Sezde partııa komıtetteriniń basshylyǵynda da aýys-túıister bolyp, saıası uıym qataryna birqatar jańa músheler qosyldy. Osylaısha 998 kúnnen keıin partııa basshylyǵyna qaıta saılanǵan el prezıdenti óz sózinde saılaýshylar men barlyq partııa múshelerine alǵys bildire kelip, búginnen bastap partııanyń jańa dáýirge aıaq basatynyn aıtty:
«Partııa qurylǵaly bergi 16 jyl ishinde Túrkııanyń turaqty damýy men odan ári ósip-órkendeýinde «Ádilet jáne damý» partııasynyń áseri orasan boldy jáne aldaǵy ýaqytta da partııamyz memleketimizdiń damýynda óz rólin arttyra bermek. Ásirese, sońǵy jyldardaǵy terrorızmge qarsy kúres pen eldi demokratııalandyrý jolyndaǵy jumystar óz nátıjesin berýde», – degen partııa basshysy eldi ári qaraı damytý úshin aldaǵy ýaqytta birqatar reformanyń júrgizilýi yqtımal ekenin de aıtyp qaldy.
Aldymen 2019 jylǵa deıingi, odan keıin 2023 jylǵa deıingi jumys josparymen tanystyrǵan Túrkııa prezıdenti óz sózin bylaı jalǵady: «Bıyl jyl sońyna deıin partııa úkimetpen birlese otyryp naqty damý josparyn daıyndaıdy. Bul partııanyń jańasha baǵytta damýyna bet buratyn tarıhı jyl bolmaq. Búginge deıingi atqarylyp kelgen jumystarǵa qarqyn bere túsýimiz kerek», – dedi partııa basshysy. Sonymen qatar, ol partııanyń halyqpen jumys isteýiniń mańyzyna da toqtaldy.
«Partııa músheleri bir úıdiń balalaryndaı bir maqsat úshin qyzmet etip keledi. Tańdaǵan baǵytymyzdyń durys ekeni sózsiz. Eger partııa jumysyna qandaı da bir usynys-eskertpeleri bar azamattar bolsa, biz olardyń sózin tyńdaýǵa ázirmiz. Bul turǵyda biz kelip jatqan usynystardy qarastyryp ta jatyrmyz. Partııanyń negizgi ustanymy – halyqty bıleý emes, kerisinshe halyqqa qyzmet etý», – dep jalǵady sózin R.Erdoǵan.
Sonymen qatar, partııa basshysy Túrkııanyń úlken ózgerister aldynda turǵanyn aıta kelip, eldiń bılik júıesine engizilgen ózgeristerdiń (eldiń parlamenttik basqarýdan prezıdenttik basqarýǵa ótýi – red.) der kezinde júrgizilgenin, 2019 jylǵa deıin elde iri ekonomıkalyq reformalardyń qolǵa alynatynyn málimdedi. Sonyń ishinde 2019 jylǵa deıingi jumyspen qamtý jáne kásipkerlikti damytý baǵytyndaǵy jumystarǵa qarqyn beriletinin aıtty. Onyń sózinshe, Túrkııa ekonomıkasyn kóteretin negizgi eki sala osy bolmaq.
Budan bólek, Rejep Taııp Erdoǵan úkimettiń terrorızmge qarsy kúres jumystaryna da toqtaldy.
«Eldiń birligi men tynyshtyǵyna nuqsan keltiretin toptar men jekelegen adamdarǵa qarsy qatań sharalar qoldanylady. Táýelsizdigimizge qater tóndiretin áreketterge elde oryn joq. Eldiń egemendigin qorǵaýda barsha túrik halqy tize qosyp jumys isteıtinin qastandyq oılaıtyn uıymdar men toptar esterinde saqtasyn», – dedi R.Erdoǵan.
Osylaısha Túrkııada partııa bıligine súıengen prezıdenttik kezeń bastalyp otyr.
Baýyrjan MUQANOV, «Egemen Qazaqstan»