Qazaqstan Prezıdenti Nursultan Nazarbaev Túrkııa prezıdenti Redjep Erdoǵanǵa Ystambuldaǵy teraktige baılanysty kóńil aıtý jedelhatyn joldady, - dep habarlaıdy Aqordanyń baspasóz qyzmeti.
Jedelhatta Memleket basshysynyń qaıǵyly oqıǵany zor kúızelispen qabyldaǵany atap ótilgen.
Nursultan Nazarbaev búkil qazaqstandyqtardyń jáne jeke óziniń atynan qaza bolǵandardyń týǵan-týystary men jaqyndaryna, sondaı-aq barsha Túrkııa halqyna kóńil aıtyp, jaralanǵandardyń tez saýyǵyp ketýine tilektestik bildirdi.
Eske sala keteıik, búgin túnde Ystambulda birden eki terakt bolyp, qaza tapqandardyń sany 29 adamǵa jetken bolatyn. Oqıǵa ornyndaǵy jergilikti telearna málimetinshe, polıseıler otyrǵan avtobýstyń mańynda mınalanǵan kólik jarylyp ketken. Jarylystan zardap shekkenderdiń barlyǵy - polıseıler.
Al keıinirek Túrkııa prezıdenti Ystambulda bolǵan teraktige baılanysty málimdeme jasady. Agenttiktiń málimetinshe, Erdoǵan terrorıstik akt qaýipsizdik qyzmetindegiler men beıbit turǵyndarǵa qarsy uıymdastyrylǵanyn aıtty. Sonymen qatar, prezıdent Túrkııanyń terrorıstik uıymdarmen áli de kúresip jatqanyn aıtty. Erdoǵan Túrkııanyń bul lańkesterdi jaýapkershilikke tartatynyn aıtyp ótti.