Aqtaýda «Ábish álemi» atty birinshi respýblıkalyq teatr festıvali ótti. Tórt kúnge sozylǵan teatr festıvaline Qazaqstannyń ár óńirinen 7 teatr ujymy qatysty. Festıvaldiń basty maqsaty – aramyzdan ketkenine bir jyl bolǵan qarymdy qalamgerdi eske alý jáne onyń shyǵarmalaryn nasıhattaý bolsa, baıqaýǵa qatysýshy óner ujymdaryna qoıylǵan talap – Ábish Kekilbaıulynyń shyǵarmalaryn sahnalaý.
Sahna sheberleri Ábish shyǵarmalaryndaǵy tarıhı tulǵalardyń psıholıgııalyq erekshelikteri men qaıratkerlik qyrlaryn, tarıhı bolmysyn barynsha ashyp kórsetýge tyrysty. Qazylar quramy, nátıjeni joǵary baǵalap, eki jylda bir ret ótetin atalmysh festıvaldi ábishtanýǵa, Ábish shyǵarmalaryn ıgerýge jasalǵan ıgi qadam dep baǵalady.
«Abylaı han», «Lır patsha», «Hansha-darııa hıkaıasy», «Adam bolyp óteıin» - barlyǵy jeti shyǵarma sahnalanǵan tórt kúndik óner dodasyna 120-ǵa jýyq ártister qatysty. Festıvaldiń bas júldesi men Ábish Kekilbaev atyndaǵy marapatty «Shyńyraý» dramasymen N.Jantórın atyndaǵy Mańǵystaý oblystyq drama teatry ujymy ıelendi. Petropavldan kelgen Sábıt Muqanov atyndaǵy qazaq drama teatrynyń ujymy "Akterlyq izdenister" nomınasııasyn jeńip alsa, "Tarıhty sahnalaǵany úshin" atalymyn Tahaýı Ahtanov atyndaǵy Aqtóbe oblystyq drama teatry ıelendi. Aımaq basshylyǵy taǵaıyndaǵan "Zamanyna úndes spektakl" jáne "Úzdik Ábish Kekilbaev aýdarmasy" syıaqysyn Qyzylorda jáne Almaty oblysynan kelgen óner ujymdary ıemdendi.
Gúlaıym ShYNTEMIRQYZY, "Egemen Qazaqstan".
Mańǵystaý oblysy