Astanada Oqý-aǵartý mınıstrliginiń keńeıtilgen alqa otyrysy ótti. Is-sharaǵa Premer-mınıstrdiń orynbasary – mádenıet jáne aqparat mınıstri Aıda Balaeva, Oqý-aǵartý mınıstri Juldyz Súleımenova, Parlament depýtattary, Ulttyq ǵylym akademııasynyń vıse-prezıdenti Asqar Jumadildaev, sondaı-aq salalyq qoǵamdyq uıymdardyń jetekshileri, óńirlik bilim basqarmalarynyń basshylary, mektep dırektorlary men pedagogter qatysty, dep habarlaıdy Egemen.kz Úkimettiń baspasóz qyzmetine silteme jasap.
Otyrys barysynda Aıda Balaeva bilim berý – bul árbir adam úshin de, qoǵam úshin de óte mańyzdy baǵyt ekenin aıtty. Jańa Konstıtýsııa jobasynda bilim salasynyń máni aıqyndalyp, mańyzdy qundylyq retinde kórinis tapqanyn atap ótti. Sonymen qatar Premer-mınıstrdiń orynbasary Memleket basshysynyń tapsyrmasy boıynsha 2030 jylǵa deıingi kezeńdi qamtıtyn «Qazaqstan balalary» tujyrymdamasy qabyldanǵanyn tilge tıek etti. Bul qujat eldegi árbir balany qamtyp, qaýipsizdikke, sapaly bilimge, densaýlyqqa, otbasyǵa jáne áleýmettik qorǵaýǵa qatysty negizgi memlekettik sharalardy biryńǵaı júıege biriktiredi.
Jıynda bilim berý salasyndaǵy jetistikter de ataldy. Qazaqstan álemdegi halyq sanyna shaqqanda oqýshylar sany eń kóp 10 eldiń qataryna engen. Sonymen qatar alqa otyrysynda saladaǵy ózekti máseleler týraly da sóz qozǵaldy. Osy oraıda Aıda Balaeva mektepke deıingi jáne bastaýysh bilim berý sapasyn arttyrýdy tapsyrdy. Mektep oqýlyqtaryna taldaý júrgizip, olardy balalardyń jas erekshelikterine saı ázirleý kerektigin jáne pedagogterdiń biliktiligin arttyrý qajettigin atap ótti. Aıda Balaevanyń pikirinshe, basty nazardy balalarǵa aýdaryp, olardyń synı oılaý qabiletin damytý jáne alǵan bilimin tájirıbede qoldaný daǵdylaryn qalyptastyrý – basty mindet.
Jıynda pedagogterdi JI tehnologııalary salasynda daıarlaý máselesine den qoıylyp, muǵalimderdi qaıta daıarlaý qajettigi de qozǵaldy. Osyǵan baılanysty barlyq profıldi pedagogıkalyq joǵary oqý oryndarynda Jasandy ıntellekt fakýltetterin ashý tapsyryldy. Budan bólek, vıse-premer tehnıkalyq jáne kásiptik bilim berý júıesin de qaıta qaraý qajettigin málimdedi. Atap aıtsaq, qarjylandyrý tetigin jetildirý, eńbek naryǵyn júıeli zertteý jáne dýaldy oqytý úlgisin engizý boıynsha boıynsha shuǵyl sharalar qabyldaý tapsyryldy.
Alqa otyrysynda ınklıýzıvti bilim berý máselesine de erekshe kóńil bólindi. Premer-mınıstrdiń orynbasary erekshe bilim berý qajettilikteri bar balalardy oqytý úshin barlyq jaǵdaı jasalý kerektigin erekshe atap ótti. Kadr tapshylyǵyn sheshý maqsatynda beıindi kafedralar ashý, ınklıýzııa boıynsha mindetti pánderdi engizý jáne pedagogterdi qaıta daıarlaý baǵdarlamalaryn ázirleý boıynsha naqty tapsyrmalar berildi. Sonymen qatar Premer-mınıstrdiń orynbasary Oqý-aǵartý mınıstrligine qoldanystaǵy oqýlyqtardy irikteý tásilderin shuǵyl túrde qaıta qarap, olardy ázirleý men saraptaý sapasyn arttyrýdy mindet etti. Aıda Balaeva tárbıe jáne ıdeologııalyq jumysty kúsheıtý máselesine de arnaıy toqtaldy. Bul baǵyttaǵy jumystar Prezıdent bekitken Ishki saıasattyń negizgi qaǵıdattary men qundylyqtaryna negizdelýi tıis ekeni atap ótildi.
Oqý-aǵartý mınıstri: Býllıng úshin dırektordy jumystan bosatý orynsyz
Jıyn barysynda Juldyz Súleımenova baıandama jasady. Oqý-aǵartý mınıstri byltyrǵy vedomstvo qyzmetiniń qorytyndylaryna toqtalyp, aldaǵy kezeńge arnalǵan negizgi mindetter men basym baǵyttardy tanystyrdy.
Oqý-aǵartý mınıstri muǵalimderge arnalǵan jobanyń toqtaıtynyn málimdedi