Mańǵystaý – qalyptasqan án men jyr, kúı mektebi bar óńir. Ásirese, Mańǵystaý dese halyqtyń kókeıine, aldymen jeti qyrdan án asyrǵan jeti qaıqynyń esimi oralady.
Ánshi Kúrish Tasbolatov – ózindik oryndaý máneri bar jeti qaıqynyń murasyn jalǵap, urpaq jadyna sińirip kele jatqan aǵa býyn ókilderiniń biri. Ánshi elimizdiń ulyq merekesi – Táýelsizdiktiń 25 jyldyǵy qarsańynda aqsaqaldyq jasqa jetken bolatyn. Qos merekeni negizge alǵan Mańǵystaý oblystyq mádenıet basqarmasy men oblystyq ǵylymı-ádistemelik jáne mádenı qyzmet kórsetý ortalyǵy II Respýblıkalyq «Qaıqylardan qalǵan saz» degen atpen Mańǵystaýdyń dástúrli ánderin oryndaýshylardyń baıqaýyn ótkizdi.
Ǵasyrlar boıy san býyn urpaqtyń jete almaı ketken armanyna aınalǵan egemendiktiń qadir-qasıetin uǵyndyrý, shırek ǵasyrda Qazaqstannyń jetken jetistikterin dáripteý jáne Mańǵystaýdyń dástúrli ánshilik mektebiniń, ásirese, jeti qaıqynyń qazaqtyń mýzykalyq mádenıetindegi tarıhı rólin respýblıka kóleminde aıqyndap, rýhanı muralaryn jas oryndaýshylar arasynda keńinen nasıhattaý maqsatyndaǵy baıqaýǵa respýblıkamyzdyń túkpir-túkpirinen Batys Qazaqstan, Shyǵys Qazaqstan, Atyraý, Aqtóbe, Mańǵystaý oblystary men Almaty qalasynan 22 talapker qatysty.
– Elimizdiń barlyq óńiri án men jyrǵa óte baı jáne ár óńir ózine tán maqammen, mánermen qazaq ónerin damyta órkendetip keledi. Ár óńirdiń ónerdegi ereksheligin tek sol aımaqtyń ózinde qaldyrmaı, búkil respýblıka boıynsha nasıhattaýǵa, ulttyq ónerimizdi ortaq mádenı qundylyq retinde jastarǵa úıretýge táýelsizdik alǵan soń qol jetti. Baıqaýda biz Mańǵystaýdyń, jeti qaıqynyń ánderin jatsynbaı, naqyshyna keltire oryndaǵan elimizdiń túkpir-túkpirinen kelgen jastardyń talantyna tánti boldyq, – deıdi Mańǵystaý oblystyq ǵylymı-ádistemelik jáne mádenı qyzmet kórsetý ortalyǵynyń dırektory A.Zeıilova.
Qazaq dástúrli án óneriniń ókilderi – jelkildegen jastardyń dombyrany sheber meńgerip, áýelete án salyp, táýelsizdikke tartý jasaýy kóńil kóterdi. Jastar jalyndy, ulttyq muraǵa muqııat bolsa, mádenı muralardyń muqalmasy belgili.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy