Astana qalasynyń Qorǵanys isteri departamenti astana turǵyndaryna áskerı-tehnıkalyq mamandyqtar boıynsha tegin oqýdan ótýdi usynady, dep habarlaıdy Strategy2050.kz.
Departamentte habarlaǵandaı, kýrstar áskerge alynatyn 17,5 jáne odan joǵary jastaǵy adamdarǵa arnalǵan.
Oqýdan ótýge nıeti bar jastar úsh mamandyqtyń birin tańdaı alady: V, S jáne S1 kategorııasy bar áskerı kólik júrgizýshi, áskerı kólik júrgizýshi-elektromehanık jáne áskerı kólik júrgizýshi-avtokranshy. Oqytý Qaraǵandy jáne Kókshetaý qalalarynda QR Qorǵanys mınıstrliginiń «Áskerı-tehnıkalyq mektep» RMQK fılıaldarynyń bazasynda júrgiziledi jáne alty aıǵa eseptelgen.
«Osy jastaǵy jastar jýyq ýaqytta mindetti áskerı qyzmetten ótý úshin áskerge shaqyrylady. Al olar áskerge shaqyrylǵanǵa deıin áskerı-tehnıkalyq mamandyqty meńgerip, qyzmetti soǵan sáıkes ótý múmkindigine ıe bolady. Osylaısha, olar alǵan bilimderin praktıkada bekitip, mamandyqty jaqsy meńgerip alady. Áskerden keıin bul olarǵa jumysqa ornalasýǵa kómektesedi», - dep túsindirdi Astana qalasy Qorǵanys isteri departamentiniń áskerden tys daıyndyq bóliminiń bastyǵy, kapıtan Erbolat Júsipov.
Budan bólek, onyń aıtýy boıynsha, eger júrgizýshi S kategorııasyn 21 jasqa tolǵannan keıin ǵana ala alsa, munda ol osy kategorııany 18 jasynda ala alady.
Oqý tegin negizde ótedi. Oǵan qosa, kýrsanttarǵa kazarmada táýlik boıy turý jáne kúnine úsh ret tamaqtaný múmkindigi tegin beriledi. Oqýǵa qabyldaý medısınalyq komıssııadan ótkennen keıin júrgiziledi.