Aıtaıyn demeısiń, biraq keıbir jaılar aıtpasyńa qoıdyrmaıdy eken.
Sońǵy kezderi bazbir ánshiler sahnaǵa shyǵyp, án salyp turǵan kezde: «Qoshemet qaıda, qoshemet? Nege estilmeıdi?» dep jıi aıtatyn boldy. Zalda otyrǵan tyńdarmandardy qaıdam, «syrt kóz – synshy» degendeı, konsertti estip otyrǵan bizderge bul qylyqtary birtúrli ersi bolyp kórinetinin nesine jasyraıyq. Bireýden qoshemetti qyzǵanǵanymyz emes, shyndyǵynda solaı emes pe, aǵaıyn?
Keıde ózine ózi shapalaq soǵyp, sahnanyń myna buryshynan ana shetine áı-sháı joq júgirip, qazaqy tárbıemen úsh qaınasa sorpasy qosylmaıtyn, qaıdaǵy bir sheteldiń ánshisymaqtaryna uqsap baqqysy keletin ondaılardyń unamsyz keıipterine qaradaı qarnyń ashady-aq. Osy biz bar ǵoı, sahna mádenıetine mán bermeıtin bolyp aldyq. Baısaldy, salıqaly áýende shyrqalýǵa tıisti ándi oryndap turǵanda keı sabazdardyń jaryqqa soǵylǵan kóbelekteı qańǵalaqtaı beretinine qanymyz qaınap bitti. Súıikti estradalyq toptary men ánshileriniń sońynan tura júgirgende tártip saqshylary qorǵanyn buzyp-jaryp, esterinen tanyp jatatyn sheteldegi jankúıerlerdiń jaǵdaıy men bizdegi qalyptyń, ol jaqtaǵy qundylyq pen mundaǵy ómirdiń arasy jer men kókteı ekenin bul shirkinder nege uqpaıdy eken osy? Eýropa men Batysqa qansha jerden eliktep-solyqtaǵanmen qazaq ánshisi ol elderdi tańǵaldyra almaıtynyn túsinsin degendikten ishtegi janaıqaıdy kópshilikpen bólisýdi jón kórdik. Ánshige tek daýystyń bolýy jetkiliksiz, ol aldymen, sahna mádenıetin, horeografııany meńgergen, kópshiliktiń aldynda ózin qalaı ustaý ádebin oqyp-úırengen jan bolǵany abzal.
Júzdep, myńdap adamdar jınalatyn alańdarda óner kórsetip úırengen sheteldik juldyzdardyń óz jankúıerlerine: «Qoldaryńdy soǵyńdar, maǵan qoldaý kórsetińder», – dep iltıpat-qoshemetti qaryzǵa surap alǵan sátin eshqashan estigen de, kórgen de emespiz. Ániń tyńdarmannyń júregine jetip jatsa, olar sen aıtqyzbaı-aq, rızashylyǵyn bildirip, ónerpazdy qoshemettep, qol soǵyp jatady ǵoı.
Ánshilerimizdiń kóp bolǵanyna, sahnada jarqyrap, halyqtyń qurmetine bólenip júrgenine qýanamyz, árıne. Alaıda, álgindeı «áttegen-aıǵa» oryn bermeı, sahna ádebin saqtap júrgenimiz durys qoı deımin.
Joǵaryda aıtylǵandar – meniń jeke ózimniń pikirim. Bálkim, onymen bireý keliser, bireýler munymdy qosh kórmes. Meniki bar bolǵany ortaǵa oı tastaý ǵana edi. Endeshe, pikirimdi kópshilik durys túsiner dep oılaımyn.
Qoshemetti suramas bolar.
Káribaı ÁMZEULY,
zeınetker
Ońtústik Qazaqstan oblysy,
Sozaq aýdany