2016 jyly Qazaqstannyń elektrondyq úkimet ınfraqurylymy arqyly azamattarǵa 40 mln.astam memlekettik qyzmet kórsetildi. Osy ýaqytqa deıingi jyldarda kórsetilgen jalpy qyzmetter sany 160 mln.-nan asqan, dep habarlady «Ulttyq aqparattyq tehnologııalar» AQ Baspasóz qyzmeti.
Bıylǵy jyly suranysy joǵary bolǵan qyzmetter - mekenjaı anyqtamasy, jyljymaıtyn múlikke tirkelgen quqyqtar nemese aýyrtpalyqtar týraly anyqtama, sondaı-aq «Jyljymaıtyn múliktiń bolmaýy (bolýy) týraly anyqtama.
Sonymen qatar, qazaqstandyqtar eGov portaly arqyly onlaın tólenetin salyqtar men aıyppuldar sııaqty qyzmetterdiń qolaılylyn baǵalaıdy. Buǵan onlaın tólemderge degen suranystyń artýy dálel. Aǵymdaǵy jyly Qańtardyń 1-i men jeltoqsannyń 25-i aralyǵynda elektrondyq úkimet tólem shlıýziniń kómegimen 13 mlrd. teńgeden astam somaǵa tólemder júrgizilgen. Bul kórsetkish byltyrǵy jyl boıynsha ótken jalpy tólemderden 32,5%-ǵa artyq. Portalda onlaın tóleý qyzmeti qosylǵannan beri barlyq tólemderdiń somasy 28 mlrd. teńgeni quraıdy.
Esterińizge salsaq, 2016 jyl eGov portaly úshin mereıtoı jyl boldy – elektrondyq úkimet resýrsynyń iske qosylǵanyna týra 10 jyl toldy. Sonymen qatar, memlekettik qyzmetter boıynsha anyqtamalyq qyzmet kórsetetin Qazaqstannyń 1414 Biryńǵaı baılanys ortalyǵy 5-jyldyǵyn atap ótken bolatyn.
Bıylǵy jyldyń taǵy da bir mańyzdy jetistigi Ashyq úkimet portaldarynyń iske qosylýy boldy. Búgingi tańda tutynýshylar 4 negizgi komponentten turatyn resýrstardy paıdalana alady. Olar - «Ashyq derekter», «Ashyq NQA», «Ashyq bıýdjetter» jáne «Ashyq dıalog». О́z kezeginde «Ashyq dıalog» portaly memlekettik organdardyń birinshi jetekshileriniń blog-platformasyn qamtıdy.
Búgingi tańda «Ashyq derekter» portalynda memlekettik organdarmen mashına oqıtyn formatta 2100-den astam ashyq derekter jınaqtary ornalastyrylǵan. «Ashyq NQA» resýrsynda talqylaýǵa salynǵan qujattar jobalarynyń sany
7200-den assa, «Ashyq bıýdjetter» portalynda olardyń sany 5200-den asady. Memlekettik organdardyń jetekshilerine «Ashyq dıalog» arqyly jyl basynan beri 17 myń ótinim túsken.
Sondaı-aq elimizde «Ashyq derekter» portalyndaǵy aqparat neziginde qosymshalar men servısterdiń birqatar baıqaýy uıymdastyryldy. Atalǵan sharalar sheńberinde otandyq baǵdarlamashylar 10-nan astam mobıldik qosymsha men veb-servısti jasady.