Sýrdoaýdarma – suraýy bar qyzmet túri

Májiliste palata tóraǵasy Nurlan Nyǵmatýlınniń tóraǵalyǵymen ótken jalpy otyrysta depýtat Baqytbek Smaǵul Premer-Mınıstr Baqytjan Saǵyntaevqa depýtattyq saýal joldaǵan edi. Onda tómendegi másele kóterilip, bylaı delinedi: «Meniń atyma «Aýǵan soǵysy múgedekteriniń Qazaqstan Respýblıkasyndaǵy qoǵamynyń» ókilderi júgindi. Olar ázirlegen «Onlaın sýrdoaýdarma qyzmeti» aǵymdaǵy jyly «Qazaqstanda júzege asyrylyp jatqan úzdik áleýmettik jobalar» respýblıkalyq kórme-konkýrsynda eń úzdik áleýmettik joba bolyp tanyldy. Bul joba múmkindigi shekteýli jandar úshin memlekettik organdar qyzmetteriniń qoljetimdiligin qam­tamasyz etedi. Memlekettik mekemelerge sýrdoaýdarmashylardy ustap turý qymbatqa túsedi. Onyń ústine, respýblıkada ymdaý tili mamandaryna degen tapshylyq baıqalýda. Osynyń saldarynan zańnama talaptarynyń barlyǵyna qaramastan, barlyq menshik nysandaryndaǵy uıymdarǵa estý boıynsha múgedekterdiń aqparatqa qoljetimdiligin qamtamasyz etý kóp jaǵdaıda múmkin bola bermeıdi. Al otandyq «Onlaın sýrdoaýdarma qyz­meti» (ári qaraı «SURDO-ONLINE») ınno­vasııalyq ónimi bul problemanyń sheshi­mine aınala alady. Ol estý qabiletinen aıy­rylǵan azamattarǵa kez kelgen jerde jáne dál kerek ýaqytta kompıýter nemese smartfon arqyly qashyqtyqtan sapaly sýrdoaýdar­ma usynady. Sýrdoaýdarmany dıplomy bar, bilikti, attestattaýdan ótken mamandar táýlik boıy júzege asyrady. Bul jobanyń jumysy qarapaıym: estý boıynsha múmkindigi shekteýli jan qyzmet nemese kómek alý úshin kelgende, memlekettik mekeme personaly tek Internet arqyly «SURDO-ONLINE»-dy iske qossa, jetkilikti. Operatormen baılanys ornatylǵannan keıin smartfonnyń ne kompıýterdiń ekranynda sýrdoaýdarmashy paıda bolady jáne ol múmkindigi shekteýli adam men memlekettik qurylym qyzmetkeri arasynda aýdarma jasaıdy. Bul áleýmettik joba, birinshiden, bıýdjet qarjysyn únemdeýge múmkindik beredi. Ekinshiden, «SURDO-ONLINE» basshylyǵy óz qyzmetin keńeıtý úshin Jumyspen qamtý ortalyqtary arqyly joldanatyn ymdaý tili mamandaryna jańa jumys oryndaryn ashýǵa daıyndyǵyn bildirip otyr. Memleket basshysy «Qazaqstan joly – 2050: bir maqsat, bir múdde, bir bolashaq» atty Qazaqstan halqyna Joldaýynda Úkimet­ten bastap, jergilikti ákimderge deıingi bar­lyq memlekettik organdarǵa múgedekter bir­les­tikterimen jumysty kúsheıtýdi júktegen bolatyn. Bul rette estý qabiletinen aıyrylǵan aza­mat­tardyń qoǵamdyq birlestikterin jáne olar­dyń jobalaryn qoldaý baǵytynda, elimizde estý qabileti shekteýli adamdardy qoǵamǵa kiriktirý máselesin júzege asyrýǵa yqpal etseńiz. Sebebi, birqatar elderde, sonyń ishinde kórshi Reseıde ymdaý tilin oqytýshylardy jáne ymdaý tili aýdarmashylaryn daıarlaýdy jáne qaıta daıarlaýdy memleket qamtamasyz etedi. Osy aıtylǵandardy eskere otyryp, «SURDO-ONLINE» qyzmetin memlekettik organdarda endirý múmkindigin qarastyrýyńyzdy suraımyn».